Паведамленне акруговай выбарчай камісіі аб выніках выбараў дэпутата Палаты прадстаўнікоў Нацыянальнага сходу Рэспублікі Беларусь пятага склікання па Докшыцкай выбарчай акрузе №22.
Агульная колькасць выбаршчыкаў па акрузе – 61316, з іх прынялі ўдзел у галасаванні – 53254. За Уладзіміра Паўлавіча Андрэйчанку аддалі галасы 46149 выбаршчыкаў, за Сяргея Васільевіча Барадаўку – 1876, Івана Васільевіча Пілецкага – 1776. 2669 выбаршчыкаў прагаласавалі супраць усіх кандыдатаў. 784 бюлетэні прызнаны несапраўднымі.
Дэпутатам Палаты прадстаўнікоў Нацыянальнага сходу Рэспублікі Беларусь пятага склікання па Докшыцкай выбарчай акрузе №22 абраны Андрэйчанка Уладзімір Паўлавіч, 2 студзеня 1949 года нараджэння, старшыня Палаты прадстаўнікоў Нацыянальнага сходу Рэспублікі Беларусь, пражывае ў г.Мінску, беспартыйны.
У нядзелю па рэспубліцы прайшлі выбары дэпутатаў у Палату прадстаўнікоў Нацыянальнага сходу Рэспублікі Беларусь. Яны адбыліся па ўсіх 110 акругах краіны, прычым самая вялікая яўка выбаршчыкаў традыцыйна азначаецца ў нашай вобласці. На Віцебшчыне прагаласавала 80,7 працэнта ўсіх выбаршчыкаў. Па Докшыцкай выбарчай акрузе №22, у якую ўваходзіў і Ушацкі раён, вылучалася тры кандыдаты. За Уладзіміра Паўлавіча Андрэйчанку аддало галасы 8983 (87,35%) ушачан, за Сяргея Васільевіча Барадаўку – 309 (3%), Івана Васільевіча Пілецкага – 270 (2,63%). 572 (5,56%) прагаласавалі супраць усіх, 150 бюлетэняў прызнаны несапраўднымі. Усяго прагаласавала 10284 (85,31%) ушачан.
23 верасня. 8 гадзін раніцы. На Вяркудскім участку №70 члены выбарчай камісіі падыходзяць да ўрны. Адкрываюць, нахіляюць, дэманструючы наглядальнікам, што яна пустая, апячатваюць. На чарзе яшчэ тры, меншага памеру. З імі праз некалькі хвілін яны накіруюцца ў розныя напрамкі: аб’язджаць тых выбаршчыкаў, што пажадалі прагаласаваць па месцы знаходжання. А іх крыху менш паловы ад усіх 439 выбаршчыкаў гэтага ўчастка, што і не дзіўна.
Пераважная большасць вясковага насельніцтва – пенсіянеры. У Вяркудах жа яшчэ размешчана і аддзяленне кругласутачнага прабывання для пажылых людзей і інвалідаў. Яны ведаюць, што да іх абавязкова заедуць. І тым не менш, некаторыя жадаюць самастойна прыйсці на ўчастак. Напрыклад, Ефрасіння Аляксандраўна Шчэрбік, якая нарадзілася ў далёкім 1918 годзе. Так, жанчыне 94, але і як і мноства папярэдніх выбараў, яна галасуе на ўчастку.
Наогул на Вяркудскім выбарчым участку вельмі спакойна. Няспешна, пераважна па адным, удвух ідуць галасаваць вяскоўцы, 23 працэнты з якіх аддалі свае галасы датэрмінова.
Ніколі яшчэ не галасавала дома ветэран вайны Кацярына Якаўлеўна Маёрнікава з Ушач. Сёлета яна прыйшла з дачкой, унукам і нават праўнукам. Дарэчы, вельмі многія ўшачане прыходзілі на выбары сем’ямі. Максім Грышчанка хоць яшчэ ў пачатковых класах, але ганарова заяўляе, што гэта ўжо другія яго выбары. Канечне ж ён не галасуе, але ўрачыстасць моманту раздзяляе.
Твар Алены Каваленкі нейкі надзвычай акрылены. Я меркавала, што дзяўчына прыйшла на выбары за кампанію з маці і суседкай, аказалася, што сама з’яўляецца выбаршчыцай. Прычым упершыню, таму і атрымала ў падарунак Канстытуцыю. Ну а пакідалі суседзі ўчастак яшчэ і з прысмакамі. Хоць і не прыстасавана памяшканне школы мастацтваў для буфету, аднак стол-разнасол дзякуючы работнікам грамадскага харчавання быў накрыты не толькі тут. Павялічаныя партыі выпечкі, салатаў рыхтаваліся спецыяльна, каб парадаваць выбаршчыкаў усяго раёна. Наогул прадбачлівыя прадаўцы паклапаціліся пра асартымент, а культработнікі – пра музычную праграму. Гэта традыцыйныя атрыбуты любой выбарчай кампаніі.
Выбары ў ніжнюю палату не абышліся і без удзелу замежных наглядальнікаў. Ушаччыну наведалі прадстаўнікі Германіі, Вялікабрытаніі, Ірландыі, Казахстана, цікавіліся колькасцю членаў камісіі, пажадаўшых прагаласаваць па месцы знаходжання, і атрымлівалі цікавячую іх інфармацыю.
“Мы аднагалосна прыйшлі да высновы, што выбары ў Беларусі прайшлі ў строгай адпаведнасці з заканадаўствам. Яны былі адкрытымі, дэмакратычнымі і забяспечылі права грамадзян Рэспублікі Беларусь на свабоднае волевыяўленне”, – адзначыў кіраўнік місіі назіральнікаў ад СНД Сяргей Лебедзеў.
В.КАРАЛЕНКА.
Да уж….