Штогод ад атручвання алкаголем у нашай краіне памірае каля трох тысяч чалавек. З п’янствам спрабуюць змагацца і забаронамі, і законамі, і медыцынскімі прыёмамі, а яму ўсё хоць бы што! Свой “пасільны” ўклад у працэс дэградацыі насельніцтва ўносяць і аматары падзарабіць на чужым горы – рэалізатары сумніўных алкагольных напіткаў. Дастукацца да іх свядомасці – складана, аднак шанс заўсёды ёсць. Менавіта таму нядаўна з супрацоўнікамі РАУС для праверкі аператыўнай інфармацыі адправіліся да самагоншчыкаў у адну з вёсак Жарскага сельсавета. 
Тое, што Сідарава (прозвішча зменена) гоніць самагон, у вёсцы здагадваліся многія. Устойлівы спецыфічны пах даўно прапісаўся ў двары жанчыны. Арганізавала “вытворчасць”, ад продажу алкаголю быў, напэўна, нядрэнны заробак. І ўсё б нічога, але адзін з мясцовых жыхароў вырашыў прыкрыць лавачку – паведаміў пра “кропку гандлю” праваахоўнікам. Неўзабаве ў вёску прыбылі супрацоўнікі міліцыі, якія зрабілі агляд дома Сідаравай. Быў складзены пратакол, канфіскавана некалькі літраў самагону, знішчана больш ста (!) літраў брагі.
Бітон каламутнай вадкасці з характэрным пахам знайшлі ў хаце жыхаркі гэтай жа вёскі. Пажылая жанчына даўно знаходзіцца на пенсіі – здавалася б, жыві спакойна, адпачывай. Дык не ж, не сядзіцца ёй без сумніўнай справы: выдзеліла цёплы куточак каля печы для бітона і чакае гатоўнасці яго змесціва. Па словах пенсіянеркі, брагу паставіла, як кажуць, на смерць і збываць не збіралася. Але прыйшлося. Увогуле, алкагольныя мінізаводзікі дзейнічаюць тут ледзьве не ў кожным другім доме. На жаль, не думаюць грамадзяне пра тое, што сваімі рукамі пад пагрозу ставяць жыцці знаёмых, сяброў, родных…
Хацелася б нагадаць, што заканадаўствам прадугледжана адміністрацыйная адказнасць за выраб і набыццё моцных алкагольных напіткаў (самагону), паўфабрыкатаў для іх вырабу (брагі), захоўванне самагонных апаратаў, а таксама за захоўванне больш пяці літраў самагону ці 30 літраў брагі. “Герояў” нашага аповяду ўжо чакае заслужанае пакаранне. Не станавіцеся наступнымі!
К.КАВАЛЕЎСКАЯ.
