У ноч з суботы на нядзелю яшчэ адзін пажар адбыўся ў раёне. На адной з сядзіб па вуліцы Каранеўскага ў гарпасёлку загарэлася лазня.
Абышлося без пацярпелых, а пабудова пашкоджана агнём. Прычынай стала парушэнне правіл эксплуатацыі пячнога ацяплення. Як высветлілася, напярэдадні лазню тапілі, а пасля гаспадыня сабрала попел і пакінула яго ў вядры ў памяшканні.
– Так рабіць катэгарычна забараняецца! З цёплым попелам у ёмістасць могуць трапіць вуглі, якія паступова разгарацца. А бывае, што для такіх мэт людзі выкарыстоўваюць нават пластмасавыя вёдры, як, дарэчы, было ў прыгаданым выпадку. Калі выносіце попел на вуліцу, высыпаць яго трэба на адлегласці ад будынкаў. Наогул дачакайцеся, пакуль ён астыне, і толькі потым выграбайце з печы, – каменціруе сітуацыю інспектар сектара прапаганды Ушацкага РАНС Ганна Ляшкова.
