Работы ў садзе неабходна пачынаць з першых цёплых дзён і, канечне, з абразання кроны пладовых дрэў. Наогул варта ўсё агледзець, зняць гнёзды шкоднікаў, муміфікаваныя плады, адмерлую кару, мох і ўсё спаліць. У дарослых дрэў ствалы і шкілетныя галіны перад афарбоўкай трэба ачысціць, такім чынам мы вызваляем дрэвы ад значнай часткі шкоднікаў. Пабелка актуальная для абароны кары ад сонечных апёкаў, растрэсквання падчас перападаў тэмпературы і асабліва для ствалоў маладых дрэў, бо дапамагае перанесці зваротныя замаразкі.
Калі ёсць пашкоджанні кары, іх неабходна загаіць: замазаць садовым варам да пачатку руху соку. Разам з абуджэннем прыроды пажадана забяспечыць абарону пладовых ад шкоднікаў і хвароб для зніжэння іх размнажэння. Прафілактычныя апрацоўкі можна пачынаць у фазу распускання пупышак і да яе. Супраць шолудзі, сопкай расы ўжываюцца такія прэпараты як Скор, Хорус, Раёк, Азафос, Тырада – пры тэмпературы ад 7 градусаў. У гэты перыяд выходзяць з зімоўкі кветкаеды, якія сілкуюцца пупышкамі. Самы просты спосаб барацьбы з імі – выкарыстанне клеевых паясоў. У фазе мышынага вуха можна прымяніць Кінфас ці Новаактыён – гэтыя прэпараты кантралююць таксама колькасць мядзянкі, шчытовак, тлі, кляшчоў.
На парэчках у перыяд набракання пупышак лёгка вызначыць кусты, заражаныя кляшчом (пупышкі павялічаныя, круглявай формы), заражаныя галіны выразаюць і спальваюць. У красавіку праводзяць дадатковае абразанне галін без пакідання пянькоў, заражаных парэчкавай шкляніцай (распусканне пупышак адбываецца пазней, чым на здаровых галінках парэчкі).
На цікавячыя вас пытанні гатовы адказаць па тэлефоне 5-73-47.
Галіна СТРЫЖОНАК,
вядучы аграном інспекцыі па насенняводстве, каранціне і ахове раслін.
