Надыход вясны заўсёды натхняе на творчасць – і невыпадкова ў гэты час праводзіцца шмат розных конкурсаў. Выхаванцы Ушацкай ДШМ праверылі ў іх свае сілы і сабралі багаты ўраджай прызоў.
У абласным цэнтры нядаўна спаборнічалі выканаўцы на струнных народных інструментах. Пацвердзілі свой высокі ўзровень цымбалісты Ганна Бехава і Канстанцін Сіманаў, з якімі займаецца педагог Ірына Коршун (абое атрымалі дыпломы лаўрэатаў ІІ ступені). Упершыню ўдзельнічала ў конкурсе выхаванка Наталлі Тарасенкі Валерыя Харак і стала дыпламантам І ступені на гэтым жа інструменце. Званнем лаўрэата ІІІ ступені парадаваў свайго выкладчыка Генадзя Савіцкага юны гітарыст Ягор Барысёнак. Хочацца адзначыць і ўдалае выступленне вучня Галіны Хвошч Святаслава Люцько: у дэбютным выхадзе на абласную сцэну хлопчык зусім не разгубіўся, выканаў праграму дакладна і артыстычна – і стаў лаўрэатам ІІ ступені. Прэзентаваць конкурсныя нумары дзецям дапамагалі канцэртмайстры Святлана Валова і Людміла Сляцкая.
Дыплом І ступені конкурсу “Яго вялікасць баян”, што ладзіўся ў Наваполацку, заваяваў Ілья Барысёнак, які атрымаў таксама спецыяльны прыз як малодшы ўдзельнік. Навучае хлопчыка педагог Алеся Анціпава. Ілья, а таксама выхаванец Вольгі Чумаковай Ягор Дунік удала паўдзельнічалі і ў абласным анлайн-конкурсе “Viva accordi”, атрымаўшы лаўрэацкія дыпломы ІІ і ІІІ ступені адпаведна.
З горада Паставы прывезлі ўзнагароды конкурсу юных піяністаў “Вясеннія ноткі” выхаванкі Алены Падворнай і Святланы Валовай Анастасія Пятроўская і Ганна Сляцкая (лаўрэат ІІІ і дыпламант І ступені адпаведна).
Плённым быў першы вясенні месяц і для юных мастакоў. Дыпломам лаўрэата І ступені абласнога конкурсу “АРТ-Асарці” ацэнены жывапіс Арцёма Пашуты (педагог – Айгуль Смык). Шэраг узнагарод прынёс ушацкім інструменталістам і мастакам анлайн-конкурс “Пакары вяршыню”, самай жа высокай з іх стаў Гран-пры Яўгеніі Пячуры (Ганна Бабянок).
Наталля БАГДАНОВІЧ.
