У суботу наш “Партызан” правёў апошні паядынак сёлетняга чэмпіянату вобласці па міні-футболе.
У чвэрцьфінале ўшачанам процістаяў віцебскі клуб “Хмель”, ігракі якога маюць вопыт удзелу ў рэспубліканскіх першынствах. Са стартавых хвілін нашы сапернікі захапілі гульнявую ініцыятыву. Пяць прапушчаных галоў сталі сапраўдным шокам – зрэшты, іх магло быць і больш, калі б не майстэрства ўшацкага галкіпера Міхаіла Ярмоша. Магчыма, многія б у такой сітуацыі апусцілі рукі – але не нашы землякі! Хлопцы сабраліся і пачалі штурм варот саперніка – у выніку за пару хвілін да завяршэння гульні розніца ў ліку скарацілася да аднаго мяча… На жаль, у канцоўцы крыху не хапіла шанцавання – табло зафіксавала лік 4-6 не на нашу карысць.
Тым не менш, пасля фінальнага свістка трыбуны ўстроілі “Партызану” авацыю: кожны наш футбаліст зрабіў на гэтым чэмпіянаце ўсё, што мог, і нават больш. Хлопцы ж, у сваю чаргу, шчыра дзякавалі балельшчыкам за падтрымку. У знак павагі паапладзіравалі нашым фанатам нават футбалісты “Хмеля”. Дзіўны факт: віцябчане гулялі на дамашняй пляцоўцы, але балельшчыкаў гасцей у зале аказалася ў разы больш. Некаторыя ўшачане прыехалі на ўласных машынах – сям’я Качынскіх, напрыклад, прывезла хлопчыкаў, якія ходзяць у футбольную секцыю. А родныя і сябры футбалістаў запоўнілі спецыяльна вылучаны аўтобус. Гэта стала магчымым у тым ліку дзякуючы ўвазе і падтрымцы, якую аказвала камандзе кіраўніцтва раёна.
Ушацкія дэбютанты сталі адкрыццём чэмпіянату і па праве ўвайшлі ў васьмёрку лепшых. Канечне, далёка не ўсё атрымлівалася, але было галоўнае: жаданне цалкам выкладвацца ў кожным матчы і адстойваць гонар раёна. Асобныя словы павагі варта адрасаваць вопытнаму іграку “Партызана” Юрыю Уладзіёнку, які выходзіў на пляцоўку з траўмай спіны, не шкадаваў пашкоджаны галенастоп Андрэй Клямяценка, а Аляксандр Грысюк гуляў с хворым каленам. Сцэментаваў каманду яе навічок і лепшы бамбардзір Арцём Гарбаценка. Школай сталення быў гэты турнір для нашай моладзі. І канечне, нельга пераацаніць уклад у футбольную справу апантаных энтузіястаў Рамана Фядосенкі і Ігара Коршуна. Увогуле добрых слоў заслугоўвае абсалютна кожны!
Турнір завершаны, але з гульнёй №1 мы не развітваемся. Ужо напрыканцы красавіка ігракі пяройдуць з залаў на зялёны газон – распачнецца чэмпіянат вобласці па вялікім футболе.
Наталля БАГДАНОВІЧ.
