27-я Міжнародная выстава-кірмаш турыстычных паслуг “Адпачынак-2025” – адно з найбольш маштабных мерапрыемстваў года. Сёлета прэзентацыйныя стэнды на “Мінск-Арэне” разгарнулі каля 600 экспанентаў, былі прадстаўлены ўсе беларускія і 16 расійскіх рэгіёнаў, 9 замежных краін. Актыўна рэкламавала свой турыстычны патэнцыял і Ушаччына.
І хоць гэта быў не дэбютны ўдзел прадстаўнікоў нашага раёна ў названым форуме, для многіх яго аспектаў можна было выкарыстаць эпітэт “упершыню”. Так, у рамках дзелавой праграмы абсалютна кожны раён сёлета змог распавесці аўдыторыі пра свае магчымасці, выкарыстоўваючы відэаматэрыялы. Гэтую місію паспяхова выканала дырэктар нашага турцэнтра Дар’я Мілая: маляўнічыя азёры і лясы, яркія фестывалі, музеі і мемарыял, санаторый і спартыўныя аб’екты – нашы галоўныя турыстычныя “казыры”. Апроч таго яна паўдзельнічала і ў спецыяльным праекце “Інвестыцыйны патэнцыял турыстычнай індустрыі Беларусі”, дзе прэзентаваліся новыя аб’екты інфраструктуры, і расказала тураператарам пра магчымасці ўзведзенага летась ва Ушачах інтэрната для спартсменаў і планах на будаўніцтва іншых спартыўных пляцовак.
Больш змястоўна распавесці пра турыстычныя магчымасці раёна на выставе ёй дапамагалі прадстаўнікі сектара спорту і турызму райвыканкама, Ушацкага лясгаса, музея народнай славы, Дома рамёстваў. Трэба адзначыць, што наша пляцоўка была запатрабаванай у наведвальнікаў, што і нядзіўна, бо тут можна было не толькі атрымаць інфармацыю са стэндаў і буклетаў, а і прадэгуставаць прадукцыю цэха па разліве безалкагольных напіткаў Ушацкага філіяла аблспажыўтаварыства (людзі ва ўзросце прызнавалі, што нашы ліманады нагадалі ім смак дзяцінства), набыць прыгожую карціну з бяросты і іншыя сувеніры, а яшчэ паспрабаваць навобмацак сапраўдную ваўчыную шкуру. Дарэчы, менавіта паляўнічыя туры з пражываннем у катэджы ў Мірным, а таксама рыбалку на Тартаку, прагулкі па дэндрапарку і этнасцяжыне актыўна рэкламавала намеснік дырэктара лясгаса па ідэалагічнай рабоце Вераніка Пацэйка. “Цікавіліся многія, бралі кантакты – спадзяюся, што адчуем плён ад удзелу ў кірмашы”, – зазначае яна.
Жаданне паўдзельнічаць у выставе выказала і гаспадыня аграэкасядзібы “Марусіна хата” Жанна Каліноўская, якая не толькі расказвала гасцям пра свой аб’ект, а і прадставіла невялічкую экспазіцыю аўтарскіх дэкаратыўных работ.
Кіраўнік нашай краіны Аляксандр Лукашэнка лічыць, што турызм павінен стаць нацыянальным праектам, а беларуская турыстычная індустрыя па значнасці і патэнцыяле не саступае, напрыклад, машынабудаўніцтву.
А напрыканцы мерапрыемства наш турцэнтр правёў розыгрыш сертыфіката на бясплатную экскурсію па Ушачах – ён дастаўся жанчыне з Баранавічаў.
“Сёлета выстава была асабліва яркай і маштабнай – мы не толькі сябе паказалі, а і на іншых паглядзелі, паўдзельнічалі ў семінарах, пашырылі веды і пачарпнулі новыя ідэі. Няма сумненняў у карысці такіх форумаў, ды і сама іх атмасфера натхняе на новыя здзяйсненні”, – падзялілася ўражаннямі Дар’я Мілая.
Наталля БАГДАНОВІЧ.
