Ва Ушачах прайшоў выязны прыём грамадзян галоўным прававым інспектарам працы Віцебскага абласнога аб’яднання прафсаюзаў Святланай Супрунчук. Мерапрыемства выклікала жывую цікавасць у жыхароў раёна, якія змаглі атрымаць кваліфікаваныя кансультацыі па шырокім коле пытанняў.
Перад пачаткам прыёма прайшла прававая асвета, у час якой Святлана Русланаўна выступіла перад членамі прафсаюза работнікаў культуры, інфармацыі, спорту і турызму, закрануўшы шэраг актуальных тэм – ад парадку ўнясення змяненняў у калектыўныя дагаворы да асаблівасцяў праходжання абавязковай дыспансерызацыі.
За 2024 год Святлана Супрунчук дала пісьмовыя адказы на 43 пытанні, якія паступілі праз форму заяўкі на бясплатную юрыдычную кансультацыю на партале 1prof.by.
Да спецыяліста звярнулася нямала ушачан. Пытанні датычыліся, у прыватнасці, нюансаў “зямельнай амністыі”, афармлення догляду за хворымі, іншых аспектаў. Асаблівая ўвага ў ходзе прыёму надавалася тлумачэнню норм працоўнага заканадаўства. “Часта канфлікты ўзнікаюць з-за элементарнага няведання сваіх правоў, – падкрэсліла Святлана Русланаўна. – Наша задача – дапамагчы людзям разабрацца ў складаных прававых пытаннях”.
Прававыя прыёмы ў гэты дзень прайшлі па ўсіх раёнах Віцебшчыны. Бясплатную кансультацыю атрымалі больш сотні працоўных.
Караліна КЛАЧОК.
