Наша зямлячка Ксенія Барысёнак зноў пацвердзіла статус аднаго з лепшых у краіне знатакоў біялогіі сярод вучняў свайго ўзросту! Адзінаццацікласніца Ушацкай школы заваявала дыплом першай ступені на заключным этапе рэспубліканскай алімпіяды па гэтым прадмеце і стала абсалютнай яе пераможцай.
Варта адзначыць, што гэта быў чацвёрты запар удзел Ксеніі ў фінале спаборніцтваў юных біёлагаў краіны – і штораз яна заваёўвала першыя месцы. Такім чынам ушачанка паказала максімальны вынік, які немагчыма пераўзысці! Дарэчы, перамога ў алімпіядзе дазволіць сёлетняй выпускніцы без іспытаў паступіць па профілі ў любую ВНУ краіны.
Нагадаем, што нядаўна Ксенія стала ўладальніцай прэміі фонду Прэзідэнта Рэспублікі Беларусь за дасягненні ў вучобе.
Шчыра віншуем таленавітую вучаніцу, яе бацькоў і настаўнікаў з выдатным вынікам!
