Хацелася б яшчэ раз нагадаць грамадзянам, чым могуць закончыцца парушэнні прыродаахоўнага заканадаўства, асабліва ў дадзены час, калі дзейнічае забарона на здабычу рака вузкапалага. Дастаткова злавіць 27 асобін гэтай жывёліны – і наступае крымінальная адказнасць. Вось некалькі прыкладаў чалавечага імкнення да нажывы.
22 кастрычніка бягучага года супрацоўнікамі Лепельскай МРІ падчас правядзення рэйдавых мерапрыемстваў быў затрыманы жыхар Полацка, які ў перыяд забароны здабываў ракаў вузкапалых падчас падводнага палявання на возеры Бельскае Ушацкага раёна. Урон, прычынены навакольнаму асяроддзю, склаў 10 мільёнаў 552 тысячы 500 рублёў. У сувязі з прычыненнем урону ў асабліва буйным памеры, выклікалася следча-аператыўная група Ушацкага РАУС, якая правяла неабходныя мерапрыемствы. Незаконна здабытыя ракі агульнай вагой сем кілаграмаў, а таксама падводная стрэльба канфіскаваны. Узбуджана крымінальная справа.
26 кастрычніка на тым жа возеры Бельскае Ушацкага раёна былі затрыманы жыхар Мінска і жыхар Фаніпаля Дзяржынскага раёна падчас сумеснай здабычы ракаў вузкапалых. Мінчанін, які злавіў 26 ракаў агульнай вагой адзін кілаграм, прычыніў урон навакольнаму асяроддзю ў памеры 1 мільён 365 тысяч рублёў. Жыхар Фаніпаля злавіў 32 асобіны рака вагой 1,5 кілаграма – урон склаў 1 мільён 680 тысяч рублёў. Матэрыялы накіраваны ў следчыя органы для ўзбуджэння крымінальнай справы. Адпаведны артыкул прадугледжвае штраф або арышт тэрмінам да шасці месяцаў, або абмежаванне ці пазбаўленне волі тэрмінам да двух гадоў.
Ф.КАВАЛЕЎСКІ,
дзяржінспектар Лепельскай МРІ.
Среда, 27.11.2024