Спарткомплекс “Юнацтва-Ушачы” сёлета быў абраны адной з пляцовак для правядзення тураў папярэдняга этапу чэмпіянату Віцебскай вобласці па міні-футболе 2025 года. Гэты факт стаў адным з аргументаў на карысць таго, каб ушацкі “Партызан” упершыню падаў заяўку на ўдзел у турніры мацнейшых каманд рэгіёна.
Рашэнню заявіцца на гэты чэмпіянат паспрыяў і ўдзел у мінулагоднім абласным першынстве па футболе. Многія памятаюць, што складаўся турнір для нашай каманды няпроста, але з цягам часу хлопцы адаптаваліся, адладзілі гульнявыя сувязі – і ў апошніх турах прыйшлі перамогі. Тэма ж міні-футбола для ўшачан, у якіх няма ўласнага стандартнага поля, затое ёсць цудоўная зала для гульнявых відаў, яшчэ больш блізкая. Натхніла і падтрымка кіраўніцтва спартыўнай галіны раёна. І яшчэ адзін прыемны сюрпрыз: жаданне згуляць за нашу каманду выказаў моцны ігрок Арцём Гарбаценка, які ў свой час быў чэмпіёнам і ўладальнікам кубка вобласці ў складзе полацкіх футбольных клубаў, а мінулы год правёў у віцебскім “Газавіку”. Як жа такі зорны футбаліст трапіў у нашу каманду? Усё проста: у снежні Арцём Ігаравіч быў прызначаны начальнікам Ушацкага ўчастка электрасувязі РУП “Белтэлекам”.
Наяўнасць аўтарытэтнага лідара ў камандзе дае ўпэўненасць і іншым ігракам. У гульні першага тура, які праходзіў у мінулую суботу, ушачане сустракаліся з фаварытамі нашай групы – наваполацкім “Нафтанам” – і выглядалі не горш за саперніка, аднак нізкая рэалізацыя галявых момантаў не дазволіла пазбегнуць паражэння. А вось у паядынку з віцебскім “Вітінструментам” гульнявая перавага нашых землякоў увасобілася ў перамогу з лікам 3:1 – два галы запісаў на свой рахунак Арцём Гарбаценка, яшчэ адзін правёў юны Мікіта Жалейка. Тут трэба сказаць, што выхаванцы Рамана Фядосенкі, за якіх мы, здаецца, зусім нядаўна хварэлі ў фінале “Скуранога мяча”, зусім не саступалі дарослым ні ў “фізіцы”, ні ў тэхніцы. Знайшлося ў складзе каманды месца і ветэранам: як заўсёды, адным з лідараў быў Юрый Уладзіёнак. Злавіў кураж Міхаіл Ярмош – а ролю галкіпера ў міні-футболе цяжка пераацаніць. Увогуле абсалютна ўся каманда выклалася на пляцоўцы на сто працэнтаў і падарыла балельшчыкам сапраўднае футбольнае свята!
Паядынкі 3 і 4 тураў чэмпіянату пройдуць на нашым спарткомплексе ў бліжэйшую суботу: гульні з удзелам “Партызана” запланаваны на 13.00 і 16.00, а сапернікамі ўшачан стануць “Ізумруд-Нафтан” і ўжо вядомы нам па першым туры “Нафтан”. Усяго на папярэднім этапе каманды правядуць па шэсць сустрэч у сваіх чатырох групах, пры гэтым кожная двойчы згуляе з усімі сапернікамі. Па дзве лепшыя дружыны выйдуць у фінальную стадыю плэй-оф.
Наталля БАГДАНОВІЧ.
