Падчас нядаўняй “прамой лініі”, якую праводзіў з жыхарамі раёна старшы інспектар групы па грамадзянстве і міграцыі Ушацкага РАУС С.М.ПУГАЧОЎ, грамадзяне задавалі самыя розныя пытанні. Мы змяшчаем адказы на тыя, якія будуць цікавымі і карыснымі шырокаму колу чытачоў.
– Да мяне ў госці на 20 дзён прыехалі сваякі з Украіны. Ці трэба ім рэгістравацца на гэты перыяд?
– Не трэба. Згодна з заканадаўствам, грамадзяне Украіны, Расійскай Федэрацыі, Літоўскай і Латвійскай Рэспублік не праходзяць працэдуру рэгістрацыі ў органах унутраных спраў на працягу 30 дзён з дня ўезду ў Рэспубліку Беларусь.
– Летам хачу на месяц запрасіць да сябе ў госці сяброў з Польшчы. Што трэба зрабіць для законнага іх знаходжання?
– Вам трэба звярнуцца ў групу па грамадзянстве і міграцыі Ушацкага РАУС для запаўнення заявы, дзе неабходна ўказаць прозвішча, імя і імя па бацьку асобы, якая запрошана ў госці, а таксама яе грамадзянства, дату і месца нараджэння, дадзеныя нацыянальнага пашпарта, адрас месца пражывання. Яшчэ неабходна прадставіць квітанцыю аб аплаце ў памеры 35 тысяч рублёў за кожнага запрошанага ў госці грамадзяніна. Тэрмін афармлення запрашэння – 10 дзён, у паскораным парадку – 5 дзён з моманту падачы заявы.
– Я – грамадзянін Расіі, пражываю ва Ушацкім раёне. Праз два месяцы заканчваецца тэрмін дзеяння пасведчання на права жыхарства ў Рэспубліцы Беларусь. Як зрабіць далейшае знаходжанне ў краіне законным?
– Для гэтага трэба абмяняць пасведчанне на права жыхарства, звярнуўшыся ў групу па грамадзянстве і міграцыі з наступнымі дакументамі: пасведчаннем на права жыхарства, нацыянальным пашпартам, квітанцыяй аб аплаце ў памеры 35 тысяч рублёў, чатырма фотакарткамі.
– Што рабіць, калі згубіўся пашпарт?
– Вам неабходна звярнуцца ў групу па грамадзянстве і міграцыі, а калі пашпарт быў украдзены, то спачатку ў аддзел унутраных спраў па месцы здзяйснення злачынства ці па месцы жыхарства. Ад вас патрабуецца заява ўстаноўленага ўзору, 4 фотакарткі, квітанцыя аб аплаце ў памеры 17500 рублёў. Падкрэслю, што згублены пашпарт аўтаматычна становіцца несапраўдным, нават калі вы яго знойдзеце.
– Ці можна з’ездзіць да блізкіх родных ва Украіну з дзіцём, якому адзін год, і не афармляць яму пашпарт?
– Для перасячэння дзяржаўнай мяжы Рэспублікі Беларусь яе грамадзяне павінны прад’яўляць пашпарт. Перасячэнне мяжы па іншых дакументах не дапускаецца. Таму вашаму дзіця таксама неабходна аформіць пашпарт.
Падрыхтавала В.ПОЛАЗАВА.
