Устойлівае марознае надвор’е нарэшце дазволіць “адвесці душу” аматарам зімняй рыбалкі: з кожным днём лёд на вадаёмах становіцца больш трывалым.
Як нам паведаміла старшыня раённага таварыства выратавання на водах Мая Пацэйка, замеры лёду падчас рэйдавых мерапрыемстваў на шэрагу азёр ужо ў сярэдзіне тыдня паказалі таўшчыню 6-7 сантыметраў. Да выхадных покрыва якраз набрала неабходную сілу, а значыць можна дастаць рыбалоўныя снасці. Але выходзіць на лёд можна, выконваючы правілы бяспекі! Сваю каварную справу могуць зрабіць вымоіны ці падводныя ключы, а таму рыбаловы і іншыя грамадзяне абавязаны апрануць выратавальную камізэльку, якая павінна адпавядаць памеру. Яна не дасць гарантыі, што вы не праваліцеся пад лёд, аднак падоўжыць час знаходжання на паверхні, а значыць – павялічыць шанц на выратаванне. Таксама рэкамендуецца мець з сабой вяроўку і лядовыя штыры, адвёрткі. Адлегласць паміж лункамі павінна быць больш метра.
Выратавальнікі нагадваюць, што рабіць, калі лёд усё ж не вытрымаў: самае галоўнае – не панікаваць. Каб выбрацца з палонкі, налягайце грудзьмі на лёд і шырока расстаўце рукі, тым самым павялічыце плошчу апоры. Выбраўшыся з вады, ні ў якім разе не ўставайце: адкаціцеся далей і паўзком дабірайцеся да берага. Калі трэба аказаць дапамогу бліжняму, узбройцеся палкай, дошкай, рэменем, ляжце на лёд і паўзіце да палонкі. Калі пацярпелы ўхопіцца за прадмет, падцягніце яго на паверхню лёду.
І на яшчэ адзін момант важна звярнуць увагу ў гэтым артыкуле. Паважаныя бацькі, пагаварыце з дзецьмі пра небяспеку зімніх вадаёмаў! У сераду днём работнікі МНС выратавалі школьніка, які тануў у Заходняй Дзвіне ў Віцебску. Хлопчык гуляў ля рэчкі, выйшаў на лёд і пачаў на ім скакаць – покрыва не вытрымала і дзіця панесла цячэннем. Выратаваны з пераахаладжэнем быў дастаўлены ў бальніцу.
Лічба: З пачатку года ў Беларусі патанула 25 чалавек, за аналагічны перыяд мінулага года – 13.
Суб’екты прафілактыкі прадоўжаць рэйды па азёрах Ушаччыны, падчас якіх будуць сачыць за выкананнем правіл бяспечных паводзін на вадаёмах.
Вольга КАМАРКОВА.
