Дарослыя дарма абвінавачваюць маладых у тым, што тыя без карысці “завісаюць” у тэлефонах, мала чым цікавяцца. Сярод юнакоў і дзяўчат нямала таленавітых і здольных, з задаткамі вынаходнікаў, рацыяналізатараў. Пацвердзіў гэта абласны этап рэспубліканскага маладзёжнага праекта “100 ідэй для Беларусі”, які прайшоў у Віцебску.
Электронная гульня “Паветраны бой” з макетамі-копіямі баявых самалётаў, праект па прымяненні сонечных электрастанцый у аграпрамысловых комплексах і нават робат, які ўмее гаварыць, бачыць, выконваць рухі рукамі… Кожная работа па-свойму здзіўляла. Тая ж, якую прэзентавалі нашы зямлячкі, вучаніцы Глыбачанскай школы Ксенія Церашкавец і Анастасія Сяліцкая (на здымку), хоць і не трапіла ў лік 17 лепшых, была адзначана ў намінацыі “Грамадства і сацыяльная сфера”.
– Мы крыху перамудрылі і замест ідэі (з ёй было б значна прасцей, ды і вынік мог быць іншым) прапанавалі на суд журы ўжо гатовы прадукт – распрацаваную віртуальную квэст-экскурсію “Партызанскімі сцежкамі”, – расказваюць дзяўчаты. – Гэта сайт, на якім наведвальнік трапляе ў гульню, падчас якой у партызанскай вёсцы знаёміцца з бытам, медыцынай, харчаваннем і іншым, выконвае тэматычныя інтэрактыўныя заданні. Для тых, хто любіць гісторыю, жадае падцягнуць веды па ёй ці проста правесці час з карысцю, раім абавязкова зайсці і згуляць. Спасылку можна знайсці на сайце Глыбачанскай сярэдняй школы.
Кацярына КАВАЛЕЎСКАЯ.
