Ушацкія лесаводы працягваюць аказваць дапамогу сваім калегам са Жлобінскага і Буда-Кашалёўскага лясгасаў на распрацоўцы ветравальна-бураломных лесасек. Ураган, які пранёсся па краіне летам, найбольшы ўрон нанёс менавіта лясным угоддзям Гомельскага рэгіёна. Адразу было відавочна, што сваімі сіламі гамяльчанам не справіцца, і Мінлясгас прыняў рашэнне камандзіраваць прадстаўнікоў іншых абласцей, каб выратаваць кожны кубаметр пашкоджанага лесу. Першапачаткова планавалася, што работы будуць скончаны да канца 2024-га, аднак у працэсе высветлілася, што аб’ёмы бураломаў значна большыя, чым па папярэдніх ацэнках.
З Ушач на Гомельшчыну адправілася спецыялізаваная лесанарыхтоўчая тэхніка – харвестары і фарвардары, лесавозныя цялежкі і сартыментавозы. Вось ужо паўгода па 15-дзённых зменах у Жлобінскім раёне працуюць работнікі нашага лясгаса. Прычым, зараз там спатрэбілася не толькі тэхніка, а і ручная праца вальшчыкаў лесу – яны шчыруюць у месцах выбарачнай санітарнай рубкі. Спецыялісты і кіраўніцтва прадпрыемства перыядычна выязджаюць на Гомельшчыну, каб на месцы высветліць многія арганізацыйныя моманты.
Як падкрэсліў на нядаўняй калегіі міністр лясной гаспадаркі Аляксандр Кулік, лясгасы Віцебшчыны ўжо выканалі сур’ёзную, самаадданую, прафесійную работу, распрацоўка хутка будзе скончана. Пастаўлена задача да 1 сакавіка ліквідаваць бураломы, а па магчымасці і раней завяршыць работы.
“Я ніколькі не прымяншаю працу аператараў харвестараў, фарвардараў, іншых катэгорый работнікаў. Я асабіста пасля завяршэння работ падзякую ім за цяжкую працу. Людзі больш за паўгода правялі ў камандзіроўках на Гомельшчыне. Але праца вальшчыка лесу, які з бензапілой у руках і ў дождж, і ў холад шчыруе ў лесе, заслугоўвае асаблівай павагі”, – падкрэсліў на пасяджэнні калегіі Мінлясгаса Аляксандр Кулік.
Вольга КАМАРКОВА.
