Што найперш патрэбна чалавеку? Родная зямля, спакой і дабрабыт, магчымасць рэалізавацца ў сям’і і працы… Курс нашай сацыяльна арыентаванай дзяржавы апошнія 30 год скіраваны менавіта на гэтыя маякі. І калі карабель упэўнена ідзе ў сваім фарватары, абмінаючы штармы і мелі, – значыць, штурвал знаходзіцца ў правільных руках! Беларусы гэта адчуваюць – таму і не было ў большасці з нас ваганняў, каму аддаць свой голас на прэзідэнцкіх выбарах.
Пра жаданне беларусаў самастойна вырашаць сваю будучыню сведчыла яўка выбаршчыкаў – 85,7 працэнта, на Віцебшчыне ж лічба была яшчэ большай – 86,3. Высокую актыўнасць праявілі і ўшачане. Пры гэтым больш 40 працэнтаў нашых землякоў зрабілі свой выбар датэрмінова, і ў асноўны дзень на ўчастках было мнагалюдна з самага пачатку іх работы.
У Градзянцы на выбарчым участку №12 першым прагаласаваў Аляксандр Уладзіміравіч Гулевіч – і атрымаў памятны сувенір. “Вырашылі падобным чынам адзначыць актывістаў грамадскага жыцця, валанцёраў, іншых неабыякавых людзей – а такіх у нас нямала, – патлумачыла старшыня камісіі Таццяна Анатольеўна Глінская. – Аляксандр, напрыклад, дапамагаў нам удакладняць інфармацыю наконт жыхароў вёскі Пліна”.
Наша добрая традыцыя – ісці на выбары ўсёй сям’ёй, дарэчы, гэта з цікавасцю адзначаюць замежныя назіральнікі.
Вось і старшыня райвыканкама Сяргей Сяргеевіч Садоўскі як заўжды прыйшоў на ўчастак №1 з жонкай Дзінай Міхайлаўнай і двума сынамі, бо ўпэўнены, што знаёміць з грамадзянскімі абавязкамі дзяцей варта з маленства, як і паказваць узнёслую атмасферу падобных падзей. А вось знакамітага народнага майстра Уладзіміра Іванавіча Бязрукава мы ўбачылі ў кампаніі прадстаўнікоў аж двух пакаленняў нашчадкаў. “Зранку я ў сваім Арэхаўне прагаласаваў, а цяпер вось і на ўшацкі ўчастак з унучкай Насцяй і праўнукам Яраславам завітаў. Каб закон дазваляў, дык за такога лідара як наш Прэзідэнт я б і неаднаразова свой голас аддаў. Жывём добра, дзяржава наша заўсёды пра простых людзей клапоціцца”, – з імпэтам тлумачыў мужчына.
Прыходзілі не толькі сем’ямі, а і суседскімі суполкамі: напрыклад, а дзясятай гадзіне дружна прыбылі на ўчастак №2 некалькі жыхароў вуліцы Юбілейнай. Да тых жа, хто па стане здароўя ці іншых уважлівых прычынах трапіць сюды не можа, па заяўках выязджалі на дом. Не адзін дзясятак адрасоў наведалі ў гэты дзень з пераноснай скрыняй Дзмітрый Дрозд і Андрэй Агіевіч. Разам з імі на вуліцу Лясную адправіліся і мы – і аказаліся ў гасцях у Валянціны Пятроўны і Пятра Уладзіміравіча Міцкевічаў. “Уласным ходам на Калінінскую не дабяруся, таму і патэлефанавалі, каб да нас прыехалі”, – патлумачыў гаспадар. А яго жонка эмацыянальна выказала свае меркаванні пра цяперашняе жыццё: “Нам, пенсіянерам, усяго хапае – вось, паглядзіце, паліцы ў халадзільніку поўныя! А калі нехта скардзіцца, што грошай мала – дык у раёне вакансій шмат, уладкоўвайся і зарабляй… Галоўнае, каб мір быў!”
Аляксандр Сяргеевіч Тарасеня, які тым часам аб’язджаў выбаршчыкаў першага ўчастка, з гонарам прызнаўся нам, што з’яўляецца сапраўдным старажылам электаральных кампаній. Трапіў у склад камісіі яшчэ на выбарах 1994-га – якраз калі Аляксандр Рыгоравіч Лукашэнка ўпершыню быў абраны кіраўніком нашай дзяржавы – так што леташнюю дату 30-годдзя інстытута прэзідэнцтва ўшачанін у пэўным сэнсе палічыў юбілейнай і для сябе. А вось Ганна Міхейка і Андрэй Апёнак у правядзенні выбараў задзейнічаны ў першы раз: дзяўчына дзяжурыла ў якасці медработніка, а мужчына дастаўляў членаў камісіі да тых, хто галасуе на доме, а ў дні датэрміновага галасавання дапамагаў работнікам міліцыі ахоўваць правапарадак у якасці дружынніка. “Калі прапанавалі такім чынам унесці сваю лепту ў арганізацыю важнейшага дзяржаўнага мерапрыемства, згадзіўся з задавальненнем”, – прызнаўся Андрэй.
Шмат дарог скалясілі ў нядзелю прадстаўнікі ўчастка №4 у Вялікіх Дольцах, на якім нямала аддаленых вёсак. “Выехалі да выбаршчыкаў з самай раніцы – каб не хваляваліся людзі ў чаканні. Канечне, не абмінулі і дванаццаць пацыентаў палат мясцовай бальніцы сястрынскага догляду”, – патлумачыла нам член выбарчай камісіі Наталля Сямяхіна.
Канчатковыя вынікі выбараў Прэзідэнта Беларусі Цэнтральная выбарчая камісія плануе агучыць 3 лютага. «У адпаведнасці з заканадаўствам пасля правядзення выбараў нам адводзіцца 10 дзён для падвядзення вынікаў”, – заявіў старшыня ЦВК Ігар Карпенка.
У нашым раёне нямала пажылых выбаршчыкаў, і з вышыні пражытых гадоў гэтыя людзі ўдумліва ацэньваюць сучаснае жыццё. Словы “мір”, “спакой”, “стабільнасць” для іх напоўнены асаблівым сэнсам.
“Кожныя прэзідэнцкія выбары стаўлю “галачку” толькі насупраць прозвішча Аляксандра Рыгоравіча. Лічу, што беларусам пашанцавала мець такога лідара – якія мудрыя, узважаныя рашэнні ён прымае ў самых складаных сітуацыях, – не хавала сваіх сімпатый жыхарка райцэнтра Таццяна Міхайлаўна Вароніна, пакідаючы ўчастак №3. – Хочацца, канечне, на канцэрт застацца, які наш хор “Ветэран” дае, але ж па тэлебачанні якраз прэс-канферэнцыя пачалася – Прэзідэнт на пытанні журналістаў адказвае, не магу такое прапусціць”.
Вядома ж, не толькі з землякамі сталага ўзросту гутарылі мы ў нядзелю.
Для амаль паўсотні ўшачан гэта быў першы ўдзел у выбарах – пра такую падзею ім будуць нагадваць падарункі: кніга “Сімвалы суверэннай Беларусі” і брэндавая футболка ад БРСМ.
Навучэнец Мінскага дзяржаўнага каледжа сферы абслугоўвання Іван Белавусаў, які зараз праходзіць практыку ва ўшацкім аддзяленні “Белпошты”, захацеў адразу прымерыць элегантную абноўку. Пазітыўны настрой выпраменьваў і яго сябра – малады вадзіцель Данііл Сцежкін, які ўжо паўгода працуе ў ААТ “Ільюшынскі” і прызнаецца, што сустрэлі яго ў гаспадарцы вельмі добразычліва. Моладзь у нашай краіне мае самыя шырокія магчымасці, каб раскрыць свае здольнасці і таленты, а ўдзел у выбарах – шанс паўплываць на ўласнае будучае.
А вось тры юныя прыгажуні, якія выхоўваюцца ў сям’і Іны Аляксандраўны Лёлі з Ільюшына, хоць ужо і перагналі па росце сваю прыёмную маму, але галасаваць пакуль не могуць – тым не менш, на ўчастак №7, размешчаны ў мясцовай школе, усё роўна спяшаліся, бо былі ўдзельніцамі канцэрта, падрыхтаванага сельскім Домам культуры (падобныя мерапрыемствы – яшчэ адна добрая традыцыя асноўнага дня выбараў). Ільюшынцы на адным дыханні прагледзелі 20 творчых нумароў – і гэта нядзіўна, бо выступалі на сцэне іх дзеці і ўнукі – мы ўжо расказвалі, што ў мясцовых школьнікаў з аднаўленнем работы культустановы ўзнік сапраўдны “творчы бум”. А Іна Аляксандраўна ў час канцэрта адчувала гонар у трайным памеры. Калі ж запаўняла бюлетэнь, галасавала ў тым ліку і за палітыку нашай дзяржавы, якая скіравана на тое, каб ніводнае дзіця не было абдзелена клопатам і ўвагай.
Шчырая размова адбылася ў нас і з яшчэ адной мнагадзетнай маці – сацыяльным работнікам Вольгай Віктараўнай Прадзедавай, якая галасавала на ўчастку №9 у Арэхаўне. Яе старэйшая дачка зусім нядаўна выйшла замуж, малодшая – яшчэ школьніца, а сынок наведвае дзіцячы сад. Канечне, хочацца, каб дзеці мелі ўсё неабходнае, таму сям’я, хоць і жыве ў кватэры, трымае падсобную гаспадарку. Жанчына ўпэўнена, што працавітыя людзі, што жывуць у глыбінцы, заўсёды змогуць забяспечыць сабе дастойны
ўзровень жыцця.
Цікавай была і гутарка з Любоўю Іванаўнай Гарыслаўкай. Работніца спажыўкааперацыі падкрэсліла, што таксама 30 год з задавальненнем абслугоўвае ўшачан на выбарчых участках. Вось і ў гэты раз у яркім нацыянальным касцюме яна адпускала землякам вельмі апетытныя пачастункі, ад якіх літаральна ламіўся прылавак – кулінары Ушацкага філіяла прыгатавалі да святочнага дня больш паўсотні адзінак прадукцыі, ды яшчэ і значныя скідкі прадугледзелі. А фірменны пірог з павідлам можна было прадэгуставаць бясплатна. Падобныя кропкі працавалі і на іншых участках. Ну а на выставах вырабаў народных умельцаў прапаноўвалі набыць памятныя сувеніры. Менавіта святочным настроем, атмасферай еднасці і пазітыву запомняцца нам прэзідэнцкія выбары-2025.
Наталля БАГДАНОВІЧ.
