Абласны этап спаборніцтваў па біятлоне “Снежны снайпер-2025” на прызы Прэзідэнцкага спартыўнага клуба прайшоў на гэтым тыдні ў Віцебску.
Сёлета ў сувязі з неспрыяльным надвор’ем каманды раёнаў былі прадстаўлены крыху меншым складам – у абласны цэнтр адправіліся толькі самыя моцныя спартсмены, таму гонар Ушаччыны адстойвалі 5 юных біятланістаў. Па выніках спаборніцтваў сфарміравана абласная каманда, якая прадставіць рэгіён у фінале: у яе склад увайшлі па чатыры хлопчыкі і дзяўчынкі з кожнай узроставай групы, што паказалі лепшыя вынікі ў спрынтарскай гонцы – усяго 24 чалавекі.
У іх лік трапілі і дзве вучаніцы Вялікадолецкай школы – выхаванкі настаўніка Уладзіміра Лапіцкага Ксенія і Ганна Букі. Для Ксюшы паездка ў Раўбічы будзе не першай: яна выдатна выглядала летась на галоўнай біятлоннай трасе краіны, а сёлета выступіць у сярэдняй узроставай групе. А вось яе сястрычка дэбютуе ў фінале і будзе змагацца ў малодшай катэгорыі. На абласным жа этапе Аня заваявала “срэбра” і падтрымала годныя традыцыі нашага раёна ў гэтым відзе спорту.
Дзмітрый Гоман і Мікіта Бугаёў увайшлі ў рэзервовы склад зборнай.
Кацярына ГРАЧОВА, метадыст раённага вучэнба-метадычнага кабінета.
