Інтэрнэтам зараз карыстаецца звыш 8,5 мільёна людзей. Многія з іх захоўваюць у сваіх гаджэтах важную інфармацыю – не задумваюцца, што гэта можа згуляць на руку зламыснікам.
“Кожны год кібермахляры прыдумваюць усё новыя ўлоўкі, на якія трапляюць даверлівыя грамадзяне, – расказвае начальнік сектара Наваполацкага міжраённага аддзела Дзяржаўнага камітэта судовых экспертыз Раман Еўдакімаў. – Для аказання садзейнічання праваахоўным органам летась правялі больш сотні камп’ютарна-тэхнічных экспертыз: правяралі даныя ў ноўтбуках, мабільных тэлефонах, флэш-накапляльніках, аналізавалі гісторыю браўзераў, паведамленняў у мэсанджарах, даныя геалакацыі. Асноўная задача – знайсці сляды віртуальных злачынстваў”.
Большасць такіх даследаванняў традыцыйна звязана з доступам да чужых плацежных карт, крадзяжамі грошай з выкарыстаннем інтэрнэта. Каб не аказацца ў ліку пацярпелых, эксперты раяць ні ў якім разе нікому не паведамляць рэквізіты сваіх банкаўскіх карт, устанавіць двухузроўневую сістэму абароны пры спісанні з іх сродкаў і антывірусную абарону на камп’ютары, мабільным тэлефоне, прадугледзець складаныя літарна-лічбавыя паролі з рознай транскрыпцыяй і транслітам. Аформіце асобную карту для пакупак у інтэрнэце, не пераходзьце па падазроных спасылках, пераправярайце дакладнасць інтэрнэт-рэсурсаў, якія наведваеце. Не размяшчайце ў адкрытым доступе і не перадавайце нікому інфармацыю асабістага характару. Нагадайце пра ўсё гэта сваім дзецям”.
Падрыхтавала Кацярына КАВАЛЕЎСКАЯ.
