Ад ушачан у рэдакцыю паступіла некалькі пытанняў, звязаных з галасаваннем на выбарах Прэзідэнта Рэспублікі Беларусь. Пракаменціраваць іх мы папрасілі старшыню раённай выбарчай камісіі Ганну Генадзіеўну Кандрацкую.
Ці можна галасаваць, калі 18 гадоў спаўняецца якраз 26 студзеня?
– У чалавека, якому 26 студзеня спаўняецца 18 гадоў, ёсць права прагаласаваць. А вось калі ён прыйдзе на датэрміновае галасаванне, то такой магчымасці ў яго не будзе, таму што 18 гадоў яму яшчэ не споўнілася.
Хачу прагаласаваць, але па стане здароўя не магу прыйсці на ўчастак для галасавання ні ў дзень выбараў, ні датэрмінова.
– Выбаршчыкі, якія па стане здароўя ці іншых уважлівых прычынах не могуць прыйсці ў дзень выбараў на ўчастак для галасавання, маюць права звярнуцца з просьбай арганізаваць галасаванне па месцы знаходжання ў дзень выбараў – на доме. Такі зварот можна накіраваць самастойна або праз родных, знаёмых, сацработнікаў, старэйшын ва ўчастковую выбарчую камісію свайго ўчастка для галасавання ў любы час пасля яе ўтварэння, а ў дзень галасавання – не пазней, чым за дзве гадзіны да закрыцця ўчастка – да 18.00.
Ці магу я на ўчастку для галасавання сфатаграфавацца разам са сваёй сям’ёй, хачу захаваць гэты момант для гісторыі?
– Гэта не забаронена, аднак майце на ўвазе, што ажыццяўляць фота- або відэаздымку запоўненых бюлетэняў катэгарычна забараняецца! Роўна як і выносіць бюлетэні за межы ўчастка для галасавання. Парушэнне гэтых правілаў цягне за сабой адміністрацыйную адказнасць у выглядзе штрафу. Нельга фатаграфаваць і членаў выбарчай камісіі, а таксама іншых выбаршчыкаў без іх згоды.
Калі не магу сам запоўніць бюлетэнь – у мяне пералом рукі, магу папрасіць на ўчастку для галасавання чыёй-небудзь дапамогі?
– У такім выпадку Вы можаце папрасіць дапамогі старонніх асоб, але гэта не могуць быць члены камісіі, назіральнікі ці давераныя асобы кандыдатаў у Прэзідэнты.
Што рабіць, калі пры запаўненні бюлетэня дапусціў памылку і паставіў адзнаку не там: закрэсліць ці папрасіць новы?
– Калі пры галасаванні вы памыліліся радком і “птушка” разам з вашым голасам “паляцела” да іншага кандыдата, то неабходна папрасіць новы бланк, а сапсаваны экзэмпляр з уласным подпісам аддаць членам камісіі. Вам выдадуць новы бюлетэнь і зробяць адзнаку ў спісах насупраць вашага прозвішча аб дапушчанай памылцы і паўторнай выдачы бланка. А папярэдні бюлетэнь пагашаецца, аб чым складаецца акт. Але майце на ўвазе, што яшчэ адзін атрымаць ужо будзе нельга.
Падрыхтавала Вольга КАМАРКОВА
