Сёння па ўсёй краіне завяршаецца дабрачынная акцыя “Ад усёй душы”. У яе рамках на Ушаччыне праведзена нямала мерапрыемстваў, увагай з боку раённага кіраўніцтва, прадстаўнікоў грамадскіх арганізацый і ўстаноў, маладога пакалення ахоплены дзясяткі людзей “залатога” ўзросту.
Прыгожы касцюм, акуратная прычоска, аздобленая шалем у тон… Як сапраўдны эталон элегантнасці сустракала ў панядзелак гасцей Галіна Серафімаўна Мірановіч. Такой яна была заўсёды: калі не адно дзесяцігоддзе вяла ўрокі ў Плінскай школе, за падрыхтоўку алімпіяднікаў атрымлівала ордэн Працоўнага Чырвонага Сцяга. “Ваш візіт – чарговая радасць для мяне, паказчык таго, што ў жыцці зрабіла ўсё правільна”, – атрымліваючы падарункі ад намесніка старшыні Ушацкага райвыканкама Генадзя Ягорава, старшыні раённай ветэранскай арганізацыі Ніны Васілеўскай, дырэктара ТЦСАН Вольгі Ізмайловіч, казала наша зямлячка.
Невыпадкова наведалі Надзею Васільеўну Каваленка з Белага і Ніну Цімафееўну Любельскую з Мосара. У студзені абедзве адсвяткавалі дні нараджэння – 94-ы і 91-ы па ліку, ну а зараз сустракалі гасцей у рамках дабрачыннай акцыі. Павіншаваць доўгажыхарак, пацікавіцца асабістымі і вясковымі справамі ў складзе вялікай каманды прыехалі начальнік упраўлення па працы, занятасці і сацабароне райвыканкама Святлана Васілеўская і старшыня Сарочынскага сельвыканкама Віталь Клімашэўскі.
“Вашай бадзёрасці, нягледзячы на лічбу 90, што значыцца ў пашпарце, можна толькі пазайздросціць”, – казала ветэрану працы, ардэнаносцу, жыхарцы Рыбакоў Алене Зіноўеўне Гараднічай першы сакратар райкама БРСМ Рыта Хрыпель. Моцнага здароўя жадалі госці і яшчэ адной юбілярцы мінулага года Валянціне Аляксандраўне Хамічонак, якая зараз жыве ў дачкі ва Ушачах – у гады вайны разам з партызанамі яна выходзіла з блакаднага кола і сустрэла вызваленне ў Мінску. Ну а ў кватэры Уладзіміра Іванавіча і Тамары Аляксандраўны Лазарэнка ўсе дзяліліся апошнімі навінамі, абмяркоўвалі святы – пра сур’ёзныя праблемы са здароўем сямейная пара, здаецца, хаця б некаторы час не ўспамінала.
Нямала было на Ушаччыне і масавых мерапрыемстваў. Так, напрыклад, на Калядны баль, які другі год запар ладзіцца па ўсёй краіне, у раённы цэнтр культуры сабралася нямала пар элегантнага ўзросту – разам кружыліся ў вальсе, выплясвалі польку, кадрыль, падыспань.
Не аднойчы сустракалі гасцей у цэнтры дзяцей і моладзі. Для ветэранаў педагагічнай працы тут наладзілі традыцыйныя “Калядныя сустрэчы” – паміж канцэртнымі нумарамі абмяркоўвалі цяперашнія дасягненні ў сістэме, успаміналі ранейшыя гады. На конкурсна-гульнявую праграму запрасілі грамадзян пажылога ўзросту з адпаведнага аддзялення ТЦСАН. Дарэчы, нагода павесяліцца была ў іх і непасрэдна ў Градзянцы, дзе прайшла рэтра-вечарынка “Народжаныя ў СССР” – удзельнікі ўспаміналі навагоднія вершы, хіты 80-х, глядзелі фотаздымкі сваёй маладосці, ды і ў імправізаваны буфет заходзілі, заробленыя ў тэматычных конкурсах савецкія манеты трацілі.
Удзел у дабрачыннай справе прынялі прафсаюзы, прадстаўнікі многіх прадпрыемстваў і арганізацый Ушаччыны.
…Ці будуць нашы землякі чакаць чарговую акцыю? Безумоўна! Аднак сумаваць увесь гэты час дакладна не стануць: на Ушаччыне, як і ў краіне ў цэлым, разнапланавая работа з пажылымі людзьмі вядзецца на пастаяннай аснове.
Кацярына КАВАЛЕЎСКАЯ.
