Член Савета Рэспублікі Нацыянальнага сходу Рэспублікі Беларусь, старшыня раённага Савета дэпутатаў Наталля Марковіч наведала Глыбачанскую бальніцу сястрынскага догляду.
Сенатар азнаёмілася з умовамі знаходжання, аказаннем медыка-сацыяльнай дапамогі грамадзянам, працай медперсаналу, пагутарыла з пацыентамі і адказала на пытанні работнікаў.
Падчас рабочага візіту ў аграгарадок Наталля Мікалаеўна таксама азнаёмілася з асартыментам тавараў у магазіне Ушацкага філіяла аблспажыўтаварыства (на здымку). Гэты аб’ект быў абраны невыпадкова: раней паступалі нараканні на адсутнасць многіх тавараў як у гэтай гандлёвай кропцы, так і ў іншых вясковых. Маніторынг паказаў, што сітуацыя прыкметна змянілася ў лепшы бок – на паліцах быў выбар малочкі, каўбасных вырабаў, фрукты, садавіна, з якімі летась бывалі перабоі. Аднак, як зазначыла наш сенатар і дэпутат, супакойвацца на гэтым нельга і трэба надалей працаваць над асартыментам, каб вяскоўцы не былі нічым абдзелены. Тым больш што на “прамую лінію”, прыём грамадзян, якія ўчора Н.М.Марковіч праводзіла з жыхарамі Ушаччыны і суседніх рэгіёнаў, яшчэ паступалі заўвагі наконт асартыментнага пераліку ў сельскіх населеных пунктах. Таксама грамадзяне звярнуліся да сенатара з пытаннямі, якія датычыліся дарожнага абслугоўвання, пенсійнага заканадаўства, аказання матэрыяльнай дапамогі, атрымання паслуг лагапеда і інш. Усім заяўнікам дадзены тлумачэнні, асобныя пытанні ўзяты на кантроль.
Вольга КАМАРКОВА.
