Павялічыць вытворчасць прамысловай і сельскагаспадарчай прадукцыі, павысіць узровень заработнай платы і якасць жыцця насельніцтва, замацаваць ва Ушацкім раёне як мага больш моладзі – гэта і многае іншае прадугледжана Стратэгіяй развіцця раёна на бліжэйшыя гады. Распрацаваць пэўную праграму дзейсных мер для павышэння ключавых эканамічных паказчыкаў Ушаччыны даручыў падчас свайго візіту ў раён у студзені гэтага года прэм’ер-міністр краіны Раман Галоўчанка. Стратэгія, разлічаная да 2030 года, абмеркавана на пасяджэнні аблвыканкама, а нядаўна адзінагалосным рашэннем прынята і на сесіі раённага Савета дэпутатаў. Дакументам запланавана больш 130 мерапрыемстваў, а ключавымі кропкамі росту стануць аграпрамысловы комплекс і турызм. Аб тым, як будзе развівацца наш рэгіён у бліжэйшыя гады, мы пагутарылі са старшынёй райвыканкама С.С.САДОЎСКІМ.
– Сяргей Сяргеевіч, сельская гаспадарка – харчовая бяспека краіны, але ж дабіцца высокіх вынікаў у гэтай галіне няпроста…
– Наш раён аграрны і яго немагчыма ўявіць без сельгасвытворчасці, у бліжэйшыя гады развівацца будуць усе накірункі, у тым ліку свінаводства. Некалькі гадоў у раёне паспяхова функцыянуюць свінакомплексы ЗАТ “Віцебскаграпрадукт”, якія фарміруюць больш як 57% прадукцыі жывёлагадоўлі Ушаччыны. З 2021-га рэалізуе інвестпраект па стварэнні свінакомплексу прыватнае прадпрыемства “Сарочына-Агра”, якое ўжо ўклала больш за 500 тысяч рублёў уласных сродкаў, з’явілася 18 новых працоўных месцаў. У 2026-2030 годзе ў рамках праграмы “Адзін раён – адзін праект” прадпрыемства мае намер стварыць аграхолдынг, які ўключае ўсе этапы вытворчасці, пачынаючы ад вырошчвання і заканчваючы выпускам гатовай прадукцыі пад уласным брэндам.
У жывёлагадоўлі таксама акцэнт будзе зроблены на мадэрнізацыю наяўных і ўзвядзенне новых аб’ектаў. Праграмай развіцця да 2030 года прадугледжана будаўніцтва двух малочна-таварных комплексаў на тэрыторыі КУСГП “Вялікадолецкае” і ААТ “Ільюшынскі”.
– Улічваючы прыродна-кліматычныя ўмовы рэгіёну карэкціроўкі патрабуюць падыходы і ў раслінаводстве?
– Аптымізуецца структура пасяўных плошчаў з паэтапным павелічэннем пасеваў шматгадовых траў да 7,6 тысячы гектараў, што дасць магчымасць забяспечыць статкі кармамі ў разліку не менш за 30 тысяч тон кармавых адзінак. Вырошчванне кукурузы на зерне плануецца ажыццяўляць на плошчы 1500 гектараў з наступным яе плюшчэннем на кармавыя мэты. Пашырацца плошчы люцэрны як культуры, устойлівай да недахопу вільгаці, будзем вырошчваць бабова-злакавыя сумесі траў з высокай пажыўнасцю.
– Наша Ушаччына, безумоўна, прывабны край для турыстаў. Іх колькасць з 2020 па 2024 год вырасла больш, чым удвая. Якія віды будзем развіваць у першую чаргу?
– Найбольш перспектыўныя для Ушаччыны – санаторна-аздараўленчы, актыўны і падзейны. Працягнецца мадэрнізацыя “Лясных азёр”, маштабны інвестпраект збіраецца рэалізаваць ТАА “Вяркудскі падворак”, які ўключае тры накірункі: стварэнне комплексу турыстычных аб’ектаў на тэрыторыі незавершанага будаўніцтвам санаторыя “Вечалле”, дзе будуць аказвацца паслугі па аздараўленні, лячэнні, касметалогіі, аднаўленні і рэабілітацыі; арганізацыя цяплічнай гаспадаркі і вытворчасці фермерскай прадукцыі пад адпаведным брэндам; будаўніцтва базы адпачынку для паляўнічых у Павуллі. Праект разлічаны да 2028 года і прадугледжвае стварэнне каля 80 новых працоўных месцаў.
Дарэчы, прывяду цікавы факт: у 1980-х гадах з падачы Пятра Машэрава, які бачыў ва Ушацкім раёне ідэальнае месца для адпачынку, архітэктар Леанід Крукоўскі распрацаваў праект, у якім Ушаччына разглядалася як курорт. У планах было будаўніцтва ў раёне чатырох санаторыяў, а ў гарпасёлку – іх агульнай маркетынгавай службы, дзе б кожны, хто прыехаў на адпачынак, мог у адным месцы атрымаць усю неабходную інфармацыю. Праект быў прызнаны практычным, а на адпаведным конкурсе атрымаў чатыры дыпломы з пяці. Аднак, тады па розных прычынах не быў рэалізаваны.
Папулярызацыя актыўнага турызму будзе магчымая дзякуючы развіццю спартыўнай сферы. Паспрыяе гэтаму комплекс “Юнацтва-Ушачы”, які прымае спартсменаў, у тым ліку і замежных. Будзем пашыраць фармат нашых падзейных брэндавых мерапрыемстваў – патрыятычнай акцыі “Прарыў Перамогі” і фестывалю экстрэмальных відаў спорту “ЭкстрымПрарыў”.
– Прадоўжаць сваё развіццё і іншыя накірункі эканомікі?
– Філіял “Ушацкі” завершыць рэалізацыю праекта па пашырэнні і тэхнічным перааснашчэнні вытворчасці бялкова-вітамінных дабавак, а гэта дазволіць не толькі выйсці на сучасны ўзровень, а і павялічыць аб’ёмы выпуску на 20%. З’явіцца ў раёне і новая вытворчасць па вырабе вараных ракаў: ТАА “Водная даліна” выкупіла і зараз абсталёўвае памяшканне былой Мосарскай школы. Прадоўжыць сваю работу швейны ўчастак “Магатэкса”, Ушацкі філіял аблспажыўтаварыства мадэрнізуе цэх па розліве мінеральнай вады і безалкагольных напіткаў, лясгас будзе развіваць дрэваапрацоўчую вытворчасць.
– Не менш важная задача – забяспечыць камфортныя ўмовы пражывання, каб людзям хацелася не ў шумную сталіцу, а жыць ва ўтульнай глыбінцы…
– Канечне. Таму ў 2025-м і наступнай пяцігодцы запланавана будаўніцтва трох шматкватэрных дамоў ва Ушачах, дзе большасць кватэр будуць арэнднымі, а таксама індывідуальнага жылля з аб’ектамі інжынернай, транспартнай, сацыяльнай інфраструктуры. Узровень забяспечанасці жыллём да 2030-га павінен скласці 43,5 кв.м на чалавека. Прадоўжацца работы па рамонце прыдамавых тэрыторый, будаўніцтве станцый абезжалезвання, рэканструкцыі кацельных у жыллёва-камунальнай гаспадарцы, пашырэнні сетак сувязі, бягучым рамонце рэспубліканскіх і мясцовых аўтамабільных дарог, рэканструкцыі трасы Р-46 і трох мастоў у раёне. Будзем развіваць сферу гандлю і паслуг за кошт адкрыцця новых аб’ектаў, у тым ліку суб’ектамі прадпрымальніцтва. Зразумела, што кожнага чалавека заўсёды хвалюе медыцынскае абслугоўванне, а таму прадоўжыцца мадэрнізацыя ЦРБ, у тым ліку за кошт абнаўлення абсталявання. Да прыкладу, ужо ў наступным годзе 100 тысяч рублёў накіруем на набыццё апарата ўльтрагукавой дыягностыкі і абсталявання для фізіятэрапеўтычнага аддзялення.
Запланаваны стратэгіяй і іншыя мерапрыемствы – развіццё фізічнай культуры і спорту, удасканаленне сферы культуры, былы будынак дзіцячай школы мастацтваў будзе рэканструяваны пад цэнтралізаваную бібліятэчную сістэму. Асобна хацелася б вылучыць устаноўку ў наступным годзе памятнага знака “Зорачка” на беразе Вечалля, дзе ў гады вайны размяшчаўся партызанскі аэрадром: гэта своеасаблівая даніна памяці лётчыкам, якія выратавалі амаль дзве сотні дзяцей і дарослых.
Прадугледжаны і мерапрыемствы, накіраваныя на замацавальнасць кадраў – выдзяленне жылля або кампенсацыя расходаў па яго найме, даплаты маладым спецыялістам, арганізацыя актыўнага адпачынку моладзі і іншае.
– Каб ажыццявіць задуманае, патрэбны не толькі жаданне і старанні, а і фінансавыя ўкладанні…
– Большасць мерапрыемстваў праграмы развіцця маюць інвестыцыйную накіраванасць. Намечаныя планы таксама будуць рэалізоўвацца за кошт крэдытных рэсурсаў, бюджэтных і ўласных сродкаў арганізацый. Вынікам жа павінны стаць сацыяльная стабільнасць, канкурэнтаздольная эканоміка, дабрабыт і камфорт людзей. Упэўнены, што ва Ушаччыны ёсць патэнцыял і рэсурсы, каб стаць моцным рэгіёнам Віцебшчыны.
Падрыхтавала Вольга КАМАРКОВА.
