На Ушаччыне працягваецца дабрачынная акцыя “Нашы дзеці”. Без падарункаў у гэтыя дні не застанецца ніхто!
У цэнтры культуры і народнай творчасці ўжо прайшлі раённыя ранішнікі з удзелам 137 юных пераможцаў алімпіяд і конкурсаў, выдатнікаў вучобы, дзяцей-інвалідаў, хлопчыкаў і дзяўчынак з мнагадзетных, прыёмных, апякунскіх сямей. Трое нашых школьнікаў пабывалі на рэспубліканскім навагоднім свяце ў Палацы Рэспублікі, 25 – на абласной ёлцы ў Віцебску.
Традыцыйна нямала гасцей – у доме сямейнага тыпу аграгарадка Арэхаўна. У апошнія дні 2024-га яго выхаванцаў наведалі член Савета Рэспублікі Нацыянальнага сходу Рэспублікі Беларусь, старшыня Ушацкага раённага Савета дэпутатаў Наталля Мікалаеўна Марковіч, начальнік аддзела па адукацыі райвыканкама Людміла Васільеўна Давыдава. Прычым, не проста віншавалі – спаўнялі дзіцячыя мары, падарылі тое, што малыя прыгадалі ў сваіх лістах Дзеду Марозу: самакат, модны гадзіннік і нават “салон прыгажосці”.
Нямала запланавана на Ушаччыне і іншых дабрачынных мерапрыемстваў: жаданне парадаваць дзяцей выказалі многія працоўныя калектывы і проста неабыякавыя людзі.
Кацярына КАВАЛЕЎСКАЯ.
