Без удзелу 11 “А” Ушацкай школы абыходзіцца мала якое мерапрыемства раёна. Шмат дзе былі і многа бачылі. Здзівіць выпускнікоў цяжка. І ўсё ж у супрацоўнікаў музея гэта атрымалася, запрасіўшы на адкрыццё “Партызанскай ёлкі”. Не чакалі вучні ўбачыць у цёмнай карціннай галерэі дрэўца, упрыгожанае лістоўкамі з фронту, гірляндай з газет, даваеннымі цацкамі і бляшанай зоркай на верхавіне. Яе спецыяльна выразалі, як рабілі гэта ў ваенны час. Музейныя работнікі перагарталі шмат матэрыялу, адшукалі лісты з навагоднімі пажаданнямі партызан, якія, дарэчы, і чыталі ля ёлкі школьнікі. Вадзілі карагод, спявалі і, канечне, частаваліся. А сапраўднымі ласункамі для дзяцей ваеннага часу лічыліся пернікі, асабліва з сухафруктамі, сушаныя яблыкі і грушы, ды нават проста цукар.
Ну а самае галоўнае ў “Партызанскай ёлцы”, безумоўна, інфармацыя аб парадках і традыцыях у брыгадах. Мсціўцы не толькі ваявалі, але і ездзілі ў атрады і вёскі з канцэртамі, ладзілі святы, пісалі карціны. Аднак, пра ўсё гэта вы даведаецеся, калі зазірнеце на “Партызанскую ёлку”.
