Калі пад’язджалі да Кастрычніцкай, 34, дом не вылучаўся сярод астатніх. І вось пачаў ажываць – загарэліся агеньчыкі на туях і ўсіх садовых дрэвах, зорачкі на доме і ледзяшы на вазонах, ёлка-шацёр у глыбіні ўчастка і вісюлькі пад страхой. За секунды сядзіба ператварылася ў казачны церам. Многа да гэтага бачылі ўбраных дамоў, але каб вось так маштабна, прадумана па каляровай гаме і ахапіўшы літаральна ўвесь участак, у тым ліку і за домам – хіба на сядзібе Журко на Вечальскай.
На жаль, ніякія камеры не перадаюць святочнага каскада, што вырывае з цемры дом. Паўкіламетра гірлянд і 7 падаўжальнікаў, не лічачы асобных светлавых элементаў, якія, як і на вокнах, сілкуюцца непасрэдна з дома, куплёны Дзед Мароз і самаробная Снягурка – Валянціна Дзмітрыеўна Карчэўская (на здымку) стварала такое хараство паступова, штогод далучаючы нешта новае. Прычым, толькі пад самым дахам упрыгожанне вешаў сын, усё астатняе – сама. На электраэнергіі не эканоміць, кажа, што падзараджаецца ад створанай зімовай казкі, а таксама ад увагі праезджых – кожны вечар ля дома нехта спыняецца і робіць відэа і фота.
