Прайшоўшы выпрабаванні 2020 года, вытрымліваючы ціск беспрэцэдэнтных санкцый, наша краіна працягвае стваральнае развіццё, расстаўляючы прыярытэты: мір і народнае адзінства, захаванне гістарычнай памяці і традыцыйных каштоўнасцей, добрасуседства і сяброўства. Мы можам смела заяўляць, што Беларусь – краіна міру і згоды. Менавіта такую тэму абмяркоўвалі ў працоўных калектывах раёна на гэтым тыдні ў рамках Адзінага дня інфармавання. Дырэктар прадстаўніцтва міждзяржаўнай тэлерадыёкампаніі “Мір” у Беларусі, старшыня рэспубліканскага грамадскага аб’яднання “Беларускі саюз жанчын” Вольга Шпілеўская сустрэлася з калектывам Ушацкай цэнтральнай раённай бальніцы.
Як падкрэсліла Вольга Аляксандраўна на сустрэчы з медыкамі, мір і згода не ўзнікаюць самі па сабе, гэта не падарунак лёсу, а вынік агульных намаганняў дзяржавы, кожнага з нас. “Нельга казаць, што мы жывём у ідэальнай краіне – так не бывае, заўсёды ёсць незадаволенасць чым-небудзь, гэта натуральна, што чалавек заўсёды хоча лепшага. І якой бы, да слова, ні была зарплата, мы б хацелі больш. Але ў нас ёсць усё неабходнае: незалежна ад памеру кашалька нас бясплатна лечаць у бальніцах, дзеці атрымліваюць веды ў школах, аплачваемы адпачынак па доглядзе за дзіцём доўжыцца тры гады. І наўрад ці хто з нас задумваўся, колькі абыходзіцца дзяржаве такая падтрымка. 54% бюджэту адпраўляецца менавіта на сацыяльную сферу. Тым часам гэтыя сродкі мы бяром з эканомікі, нездарма кіраўнік дзяржавы заўсёды падкрэслівае, што эканоміка стаіць у галаве вугла. У нас няма нафты, газу, золата, але робіцца ўсё, каб краіна развівалася, а дабрабыт людзей паляпшаўся”.
Да таго ж, Беларусь – краіна адкрытая. У пацвярджэнне гэтаму прагучалі такія красамоўныя лічбы: колькасць іншаземцаў, якія наведалі Беларусь у складзе турыстычных груп у 2023 годзе, у 3,8 раза перавысіла аб’ём турпатоку ў 2000-м. Агульная колькасць арганізаваных паездак і індывідуальных турыстаў у нашу краіну ў 2023 годзе склала 5,7 мільёна чалавек. Экспарт турыстычных паслуг у рэспубліцы ў 2023-м у параўнанні з 2005 годам вырас амаль у 10 разоў.
Ёсць такі рэйтынг самых гасцінных краін свету Welcoming Countries Rank-2024. У ім Беларусь знаходзіцца на 56-м месцы сярод 198 краін, апярэджваючы Вялікабрытанію, Канаду, ЗША і іншыя краіны свету.
Беларусь гасцінна адкрывае межы, пацвярджаючы тым самым імкненне да захавання добрасуседскіх адносін. У адказ на ціск і недружалюбныя паводзіны заходніх краін мы ўвялі бязвізавы парадак уезду для жыхароў 38 еўрапейскіх дзяржаў. Усё часцей беларусы, якія прыехалі вучыцца або працаваць, сутыкаюцца з адкрытай агрэсіяй з боку палякаў. Ці можаце вы нешта падобнае прадставіць у Беларусі? Сама думка гучыць абсурдна. Да нас прыязджаюць дзясяткі тысяч маладых людзей ад Кітая і Венесуэлы да Азербайджана і Камеруна і адчуваюць сябе, як дома. На нашай зямлі знайшлі свой дом сотні ўкраінцаў. З моманту пачатку канфлікту ў Беларусь з ЕС перамясцілася больш за 270 тысяч жыхароў суседняй краіны, якім аказваецца неабходная дапамога.
Не толькі пра мір і адзінства, а і пра дзейнасць Беларускага саюза жанчын ішла гаворка на сустрэчы Вольгі Шпілеўскай з актывам Ушацкай раённай арганізацыі Беларускага саюза жанчын. “Мы не гонімся за колькасцю членаў арганізацыі, сюды кожная павінна прыйсці па закліку сэрца, каб рабіць добрыя справы. БСЖ – гэта грамадская неаплачваемая нагрузка і ўсе мерапрыемствы, праекты мы праводзім не для справаздач і “галачкі”, а каб прынесці радасць ці дапамагчы людзям, – падкрэсліла В.Шпілеўская. – Тут можна прыгадаць форум, які да прафесійнага свята арганізавалі для працаўніц сяла ў Мінску з наведваннем тэатра оперы і балета, музея Вялікай Айчыннай вайны, аглядавай экскурсіяй па сталіцы. І калі да мяне падышла адна з удзельніц, ветэран працы і прамовіла: “Вялікі Вам дзякуй, я ніколі не была ў Мінску”, я праслязілася і зразумела, што ўсё робім правільна і такія мерапрыемствы патрэбны. Мы гатовы дапамагаць жанчынам у вырашэнні нейкіх няпростых бытавых пытанняў ці са здароўем. Так было, калі ўпершыню ў Беларусі адразу тром малышам, якія нарадзіліся з рэдкім генетычным захворваннем (СМА) увялі самы дарагі прэпарат у свеце “Золгенсма”, – расказала лідар БСЖ.
А яшчэ яна заклікала абавязкова праявіць актыўнасць і прыйсці 26 студзеня на выбары Прэзідэнта Рэспублікі Беларусь, бо ад кожнага з нас залежыць, ці будзе існаваць краіна, у якім ключы развівацца.
Вольга Аляксандраўна ў ходзе рабочай паездкі наведала санаторый “Лясныя азёры”: “На Ушаччыне я неўпершыню, заўсёды дзіўлюся прыроднай прыгажосці вашага раёна, надзвычай прыемныя ўражанні пакінула ўшацкая здраўніца, захацелася прыехаць на адпачынак у гэтае маляўнічае месца!”
Вольга КАМАРКОВА.
На здымку: старшыня раённай арганізацыі БСЖ Д.Садоўская, намеснік старшыні абласной – Н.Неушава, в.а.дырэктара санаторыя С.Сляцкі, В.Шпілеўская.
