Правядзенне маладзёжнага брэйн-рынга на Ушаччыне стала добрай традыцыяй. У гэты раз арганізатары – райкам БРСМ і аддзел ідэалагічнай работы і па справах моладзі – сабралі юнакоў і дзяўчат, якія пачалі працоўную кар’еру ва ўшацкіх арганізацыях летась і сёлета, у кафэ нядаўна адкрытага інтэрната для спартсменаў. А кубачак гарбаты і фірменныя пончыкі дадалі захапляльнаму квізу дамашняй атмасферы.
Вядома ж, у васьмідзясяты год вызвалення Беларусі ад нямецка-фашысцкіх захопнікаў не абышлося без пытанняў ваеннай тэматыкі. Трэба было, напрыклад, пазнаць голас Юрыя Левітана – легендарнага дыктара, які натхняў савецкі народ у цяжкія часы. Прыгадала моладзь і факт, што сутачная норма хлеба для жыхароў блакаднага Ленінграда ў снежні 1941-га складала ўсяго 125 грамаў…
У наступным туры ўдзельнікі ўспомнілі камсамольскую будоўлю БАМ і іншыя працоўныя подзвігі савецкай моладзі. Разгадалі і галаваломкі ад папулярных зараз нейрасетак: нават пасля апрацоўкі пазналі на фота першага сакратара ЦК БРСМ Аляксандра Лук’янава, расшыфравалі вядомыя прыказкі, сучасныя песні і казачных герояў.
Пазнавальным быў тур “Брэнды”, дзе па лагатыпах трэба было вызначыць, у якім горадзе размешчаны вядомыя айчынныя прадпрыемствы. Далёка не ўсе ведалі, што Беларусь можа пахваліцца і… галівудскімі зоркамі. Напрыклад, бацька актрысы Гвінет Пэлтроў паходзіць з роду Палтровічаў, што жылі на Навагрудчыне, прадзюсер вядомай кінакампаніі Луіс Маер нарадзіўся ў Мінску, пражывалі тут калісці і бабуля з дзядулем акцёра Харысана Форда.
Па выніках брэйн-рынга першае месца заняла зборная каманда маладых работнікаў з райбальніцы, лясгаса і дзіцячага сада №4. Другое дасталася моладзі з Ушацкай школы, трэцяе – камандзе выратавальнікаў, педагогаў і кааператараў. Усе яны атрымалі граматы і каштоўныя прызы ад райкама БРСМ.
“Было цікава і весела! З задавальненнем далучуся да падобнага мерапрыемства і ў наступны раз”, – адзначыў прадстаўнік Ушацкага РАНС Мікалай Баратынскі.
Інтэлектуальны квіз даў моладзі магчымасць не толькі паказаць і папоўніць свае веды, але і завесці новыя знаёмствы. А повары кафэ атрымалі высокую ацэнку свайго прафесійнага таленту – іх пачастункі разышліся на “ўра”.
Караліна КЛАЧОК.
