На “прамую лінію”, праведзеную натарыусам Ушацкай натарыяльнай канторы Жаннай Леанідаўнай КАВАЛЕНКА паступіла некалькі пытанняў, адказы на якія будуць карысныя чытачам.
– Шмат гадоў таму не стала мужа, спадчыннікамі пасля якога на дом у вёсцы з’яўляюся я – жонка – і яго непаўналетняя дачка. Цяпер яна хоча перадаць мне сваю долю, як гэта прасцей зрабіць?
– Можна шляхам дарэння, у выніку чаго пасля дзяржаўнай рэгістрацыі дамовы і пераходу права ўласнасці нерухомасць будзе толькі вашай. Для дарэння патрэбны дакументы, якія засведчваюць асобу (пашпарты), пацвярджаюць роднасныя адносіны і перамену прозвішча (пасведчанні аб нараджэнні і аб заключэнні шлюбу дачкі), дакументы на зямельны ўчастак і дом, даведка аб асобах, зарэгістраваных у ім, і выпіскі ад рэгістратара нерухомасці для натарыяльнага пасведчання дамовы. Кошт паслуг на сённяшні дзень складае 132 рублі.
– Памёр мой былы муж, з якім мы ў перыяд шлюбу за кошт ільготнага крэдыту пабудавалі кватэру, тытульным уласнікам якой ён з’яўляецца, але крэдыт плачу я і жыву ў гэтай кватэры разам з сынам. Ці ёсць у ёй мая доля і хто з’яўляецца спадчыннікам пасля мужа?
– Так, доля ў кватэры ў Вас ёсць, бо паводле заканадаўства, смерць мужа (у тым ліку былога) з’яўляецца падставай для вызначэння роўных доляў удзельнікаў агульнай уласнасці, аб чым натарыусам выдаецца пасведчанне на імя мужа і жонкі. Яго можна атрымаць як у перыяд шлюбу, так і пасля скасавання (незалежна ад тэрміну) па заяве аднаго або некалькіх спадчыннікаў, да першай чаргі якіх па законе адносяцца: бацькі, муж, жонка і дзеці, а таксама ўнукі па праве прадстаўлення (у выпадку, калі да смерці спадчынадаўцы памёр іх бацька). Трэба дадаць, што да спадчыннікаў пераходзяць і абавязкі, у вашым выпадку гэта сума льготнага крэдыту банка.
Падрыхтавала Вольга Караленка.
