За лістапад у Віцебскай вобласці адбылося 3 аварыйныя выпадкі з удзелам маламерных суднаў, у выніку якіх загінула 4 чалавекі. Усяго за год здарэнняў было 7, абарваліся жыцці васьмі рыбаловаў – усе яны знаходзіліся ў лодках без выратавальных камізэлек.
Захопленыя працэсам, рыбакі часта не ўсведамляюць, што на вадаёмах у асенні час небяспечна: халодная вада, нечаканае змяненне надвор’я, слізкія берагі… Апынуўшыся ў ледзяной вадзе, чалавек адчувае шок, намоклае адзенне цягне ўніз і пазбаўляе сіл, хутка надыходзіць пераахаладжэнне. Калі ж пры гэтым чалавек не надзеў выратавальную камізэльку і ўжываў алкаголь, шанцаў на выжыванне практычна няма.
Нагадаю аматарам рыбнай лоўлі некалькі важных правіл:
- Перад выхадам на ваду агледзьце лодку. Праверце герметычнасць корпуса, спраўнасць вёслаў і матора, надзейнасць мацаванняў
- Выратавальная камізэлька – не проста рэкамендацыя, а неабходнасць. Нават вопытныя рыбакі не застрахаваны ад непрадбачаных сітуацый.
- Каб пазбегнуць перакульвання лодкі, не сядзіце на борце і не ўставайце ў поўны рост. Раўнамерна размяркоўвайце вагу, пазбягаючы рэзкіх рухаў. Ставіць судна на якар неабходна такім чынам, каб нос быў накіраваны супраць ветру.
- Пазбягайце рыбалкі ў месцах з падводнымі перашкодамі. Выбірайце ўчасткі вадаёма з бачным дном.
- Катэгарычна забараняецца ўжываць алкаголь перад выхадам на ваду і падчас рыбалкі. Ён пагаршае каардынацыю, запавольвае рэакцыю. Ва ўмовах экстрэмальнай сітуацыі п’яны чалавек бездапаможны.
- Калі лодка перавярнулася, не паддавайцеся паніцы. Паспрабуйце ўхапіцца за яе, плывіце па цячэнні да берага, завіце на дапамогу.
Аляксей АЛЮШЫН, дзяржінспектар Лепельскага ўчастка дзяржаўнай інспекцыі па маламерных суднах.
