На сённяшні дзень тэма дзіцячай гібелі і траўматызму з’яўляецца вострай і актуальнай.
Лічбы статыстыкі не могуць пакінуць абыякавымі ніводнага дарослага: за перыяд з 2021 года ад знешніх прычын загінула больш 400 дзяцей, у тым ліку ў выніку суіцыду, утаплення (113), ДТЗ (70), пажараў (37), падзення з вышыні (21).
Гібель абумоўлена дзіцячай неасцярожнасцю, бестурботнасцю, невыкананнем правілаў бяспекі, адсутнасцю бацькоўскага кантролю. Прывядзём некалькі трагічных прыкладаў. У Мінску дзіця ў чаканні мамы адчыніла акно і, не ўтрымаўшыся, выпала з 10-га паверха. У жніўні ў Калінкавіцкім раёне вучні 2-га і 5-га класаў без нагляду дарослых лавілі рыбу, абодва патанулі ў рацэ.
На жаль, трагедыі з дзецьмі здараюцца і на дарогах краіны. За 9 месяцаў 2024 года загінула 18 непаўналетніх, за аналагічны леташні перыяд – 11. Нярэдка прычынай з’яўляюцца неасцярожнасць дарослых, невыкананне імі правіл дарожнага руху. Так, у кастрычніку ў Петрыкаўскім раёне мясцовы жыхар, кіруючы самазвалам, наехаў на 4-гадовае дзіця. У маі ў Касцюковічах вадзіцель МАЗа на нерэгуляваным скрыжаванні сутыкнуўся з непаўналетнім. Хлопчык ехаў на веласіпедзе з няспраўнымі тармазамі і не змог своечасова затармазіць, а пры спробе зрабіць гэта нагой, страціў раўнавагу, упаў пад колы аўтамабіля і загінуў.
З пачатку года ў агні абарвалася жыццё 11 маленькіх беларусаў, у той час як за ўвесь мінулы год такіх выпадкаў было 9. Прычынамі бяды ў асноўным стала дзіцячае свавольства з агнём. А ад сітуацыі ў Мінскім раёне сціскаецца сэрца: дзве маленькія дзяўчынкі, гуляючы з запалкамі, падпалілі штору, хутка агонь пабег па ўсім доме. Бацькі ж у гэты час знаходзіліся ў стане моцнага алкагольнага ап’янення і выратаваць дзетак не змаглі.
З 27 лістапада па 4 снежня ва Ушацкім раёне прайшоў тыдзень прафілактыкі дзіцячага траўматызму, у яго рамках зацікаўленыя службы правялі больш дзясятка прафілактычных мерапрыемстваў.
Да бяды можа прывесці, здавалася б, бяскрыўдныя зарадка ад тэлефона ці тэлевізар: яшчэ ў адным сёлетнім выпадку шасцігадовая дзяўчынка разгубілася, калі загарэлася ўключаная ў сетку зарадная прылада, не змагла ні адключыць яе, ні пакінуць памяшканне.
Вядома, стапрацэнтна зберагчы дзіця ад бяды немагчыма, але ў сілах бабуль і дзядуль, мам і тат, старэйшых братоў і сясцёр вучыць малодшых, як пазбегнуць траўм і правільна дзейнічаць у надзвычайнай сітуацыі. Многае залежыць ад прыкладу саміх дарослых. Калі вы карыстаецеся няспраўным электрапрыборам, кідаеце запалкі, перабягаеце дарогу перад аўто, то і ваша дзіця будзе рабіць гэтак жа.
Не за гарамі ўжо і зімовыя канікулы, узмацніце кантроль за баўленнем часу дзяцей, нагадайце яшчэ раз правілы бяспечных паводзін, у тым ліку забараніце выходзіць на лёд. Бацькі, дарослыя, беражыце сваіх дзяцей!
Вольга КАМАРКОВА.
