Для многіх школьнікаў урок – свайго роду выпрабаванне, бо не ўсім камфортна публічна дэманстраваць веды і ўменні. Калі ж ацэньваюць іх не свае настаўнікі і аднакласнікі, а дапытлівыя маладзейшыя вучні – градус хвалявання яшчэ больш павышаецца. Гэта вам дакладна пацвердзяць адзінаццацікласнікі груп педагагічнай накіраванасці Ушацкай школы, якія на мінулым тыдні правялі свае першыя адкрытыя ўрокі ў роднай установе. Ну а для некаторых дэбютантаў настаўніцкай справы мы падрыхтавалі “задачу з зорачкай”: дадалі стрэсу яшчэ і прысутнасцю прэсы.
Зрэшты, “прыцэл” фотакамеры іх з каляіны не выбіў. Урок рускай літаратуры ў 9 класе Ульяна Каваленка распачала, як бывалы педагог: прадставілася вучням і папрасіла іх быць максімальна актыўнымі. І тыя адгукнуліся: у час экспрэс-апытання па фактах біяграфіі Пушкіна рукі ўзнімаліся ўгару. Дзевяцікласнікі прыгадалі, што знакаміты паэт – карэнны масквіч, яго прадзед Ганібал быў хрэснікам Пятра І, а рыфмаваць радкі будучы класік пачаў у 9-гадовым узросце. Ажыўлена абмяркоўвалі факт, што ў ліцэі сябры называлі яго Французам, а ў літаратурным гуртку за няспынную гаварлівасць далі мянушку Цвыркун (сверчок). Настаўніку Алёне Валер’еўне Правада, якая заняла апошнюю парту з намерам пры патрэбе прыйсці на выручку юнай калезе, свой аўтарытэт пускаць у справу не давялося.
•Ульяна прызналася, што плануе паступаць у педагагічную ВНУ, каб стаць настаўнікам рускай мовы і літаратуры.
Вучні прыступілі да аналізу верша “Да Чаадаева”, а мы тым часам “тэлепартаваліся” з лірычных аблокаў у царства фізічных формул. Верхаводзіў у ім Павел Шакута, а ў якасці сімвала настаўніцкай улады трымаў у руках указку. Даць урок для дзесяцікласнікаў, сярод якіх, прынамсі, ёсць пераможцы раённых алімпіяд па прадмеце, – з наскоку такое не зробіш. І выкладчык грунтоўна падрыхтаваўся: пад яго кіраўніцтвам вучні прыгадвалі тэму “Цеплавыя з’явы” і падмацоўвалі веды рашэннем задач. “Якімі спосабамі можна запаліць запалку?” – запытаўся Павел Аляксандравіч у аўдыторыі – і тут жа атрымаў разгорнуты адказ, што калі яна загараецца пры трэнні аб пачак, мы ажыццяўляем работу, калі ж ад полымя іншай запалкі – адбываецца цеплаабмен.
“Гляджу на Пашу і бачу сябе на дэбютным занятку ў такой жа аўдыторыі 35 год таму, – дзяліўся ўражаннямі настаўнік фізікі Віктар Мікалаевіч Герцык, разам з якім мы назіралі за ходам урока з дальняга куточка класа. – Малайчына, добра спраўляецца! Дарэчы, плануе здаваць па фізіцы ЦТ, таму ходзіць на факультатыў, займаецца дадаткова”.
А вось Таццяна Кіліна і Анастасія Касіч вырашылі аб’яднацца ў педдуэт і ўскладніць эксперымент: папрасілі настаўніка матэматыкі… не прысутнічаць на геаметрыі ў 7 “Б”. “Папярэдзіла дзяўчат, што буду ў суседняй аўдыторыі “на падстрахоўцы”, – тлумачыла нам пазней Ірына Генадзьеўна Каваленка. – Але дапамога не спатрэбілася, і я ўжо высветліла на наступным уроку, што трэцюю прыкмету роўнасці трохвугольнікаў дзеці засвоілі”.
З маленькімі непаседамі справіцца, напэўна, яшчэ больш складана – але на занятку, які праводзіла Лізавета Лісіца, 3 “А” быў уважлівым і паслухмяным, у выніку станоўчую ацэнку юнаму педагогу далі і настаўнік Альбіна Васільеўна Барунова, і прадстаўнік школьнай адміністрацыі Вера Васільеўна Дрозд.
Праводзяць адкрытыя ўрокі і вучні груп педагагічнага профілю іншых школ. У Арэхаўскай, напрыклад, такія заняткі праходзілі ў рамках Дня самакіравання, што ладзіўся ў кастрычніку.
“Правядзенне практычных іспытаў прадугледжвае праграма профільнага навучання. Адкрытыя ўрокі дапамагаюць зразумець спецыфіку і наяўнасць прызвання да гэтай прафесіі. Для дзецей, якіх вучылі нашы дэбютанты, эксперымент таксама быў цікавым: разнастаіў школьныя будні, даў падставу паказаць сябе з лепшага боку. Такую практыку будзем працягваць”, – падвяла вынікі намеснік дырэктара па вучэбнай рабоце Галіна Уладзіміраўна Хоміч.
Наталля БАГДАНОВІЧ.
