Турыстычны інфармацыйны цэнтр Ушацкага раёна створаны паўгода таму, а 14 верасня пераехаў у сучасны офіс у новым будынку інтэрната для спартсменаў. Мы папрасілі дырэктара Дар’ю Мілую расказаць пра тое, як арганізацыя будзе спрыяць развіццю турыстычнай галіны.
– Адзін з вектараў нашай дзейнасці – прэзентацыя рэгіёна і краіны на розных мерапрыемствах. За гэты час мы пабывалі на міжнароднай выставе “Адпачынак-2024”, “Славянскім базары ў Віцебску”, рэспубліканскіх форумах турыстычных цэнтраў. Актыўна расказваем пра патэнцыял нашага краю праз удзел у конкурсах.
Яшчэ адна мэта – стаць месцам, дзе кожны турыст зможа знайсці патрэбную інфармацыю і дапамогу.
І ў нас ужо фарміруецца кола кліентаў. Напрыклад, турыст з Мінска пастаянна прыязджае на Ушаччыну, каб зладзіць падарожжа на байдарцы, і звяртаецца да нас за парадай, як скласці маршрут, дзе лепш спыніцца на начлег. Напярэдадні Дня Незалежнасці іншагароднія рабочыя, занятыя на мантажы сцэны, не маглі знайсці варыянт для пражывання: месцы для іх мы адшукалі ў “Мікалаеўскім пасадзе”. Дарэчы, гэтая аграсядзіба, а таксама “Аляксандраўскія горы” ў ліку першых заключылі з намі дагавор аб супрацоўніцтве. Спадзяемся, што наладзім стасункі з усімі аб’ектамі, далучым іх да “грамадскага жыцця”. Магчыма, правядзём конкурс аграэкасядзіб, дзе гаспадары будуць спаборнічаць, напрыклад, у прыгатаванні фірменных страў, паказваць майстар-класы.
Дапамагаем і ў арганізацыі экскурсій. Напрыклад, школьнікам з расійскага горада Цвер, якія праводзілі зборы на спарткомплексе, знайшлі транспарт для паездкі ў Бярэзінскі запаведнік. Звярнуцца да нас могуць любыя арганізацыі і грамадзяне – падкажам аптымальныя бюджэтныя варыянты. Экскурсіі па Ушаччыне праводзім і самі. А яшчэ далучаемся да праекта “Адзін раён – адзін маршрут”: складаем вандроўку, якая ахопіць галоўныя славутасці і дасць уяўленне пра наш край – інфармацыю пра яе змесцяць на сайтах турцэнтраў Беларусі і Расіі.
Заключылі шэраг дагавораў з айчыннымі тураператарамі: у ліку актыўных партнёраў – кампаніі “Віаполь”, “Адпачынак тут”, “Віцебсктурыст”. Мы даём ім інфармацыю пра ўшацкія аб’екты, паслугі, пражыванне і харчаванне. Наладжана супрацоўніцтва з лясгасам, “Ляснымі азёрамі” – санаторыю, дарэчы, дапамагаем рэалізоўваць пуцёўкі.
Пачатак пакладзены. Будзем старацца плённа развіваць розныя напрамкі: у раёне вялікі патэнцыял для актыўнага і экалагічнага, аздараўленчага і спартыўнага, іншых відаў турызму. Работы наперадзе вельмі шмат.
Наталля БАГДАНОВІЧ
