Лістапад невыпадкова аб’яўлены ў Беларусі месяцам паляўнічага турызму – гэта сезон, калі можна здабываць капытных і пушных звяроў, шматлікую іншую дзічыну.
Гэты турыстычны напрамак, да слова, адзін з самых эканамічна выгадных: летась лесапаляўнічыя гаспадаркі краіны (а іх зараз 70) зарабілі на ўнутраным турызме 21 мільён беларускіх рублёў, а ад рэалізацыі паслуг замежным грамадзянам – больш за 8,5 мільёна. Вядома ж, гэта не значыць, што нашы лясы збяднеюць на жывёлу. Што да самых папулярных у турыстаў відаў, то за апошнія 30 год, дзякуючы планамернай рабоце, колькасць высакароднага аленя ў беларускіх угоддзях павялічылася ў 20 разоў, больш стала і ласёў, казуль – зараз іх налічваецца 45 і 130 тысяч адпаведна.
Развіваюць названы від турызму і імкнуцца рацыянальна выкарыстоўваць рэсурсы і ва Ушацкім лясгасе, які мае каля 30 тысяч гектараў паляўнічых угоддзяў. Колькасць ласёў на працягу трох апошніх год тут застаецца нязменнай – каля 130 асобін, а вось на аленяў нашы бары нават крыху пабагацелі (летась было 120, сёлета – 130), у мінулым годзе налічвалася 150 казуль, зараз – 160. Лясгасаўцы пільна сочаць, каб папуляцыі не змяншаліся: у халодны час падкормліваюць жывёлу на спецыяльных пляцоўках, дазваляюць здабычу толькі ў планавых межах – летась, напрыклад, трафеямі паляўнічых сталі 22 аленя, сёлета ж норма павялічана да 25.
У нашым лясгасе багатыя традыцыі па арганізацыі паляўнічых тураў з удзелам замежных грамадзян – апошнім часам гэта пераважна расіяне. Так, летась правялі 16 для 34 паляўнічых, якія здабылі 30 казуль, па 12 ласёў і аленяў, а за 10 месяцаў бягучага года – 11 для 25 чалавек, трафеямі якіх сталі 22 жывёлы прыгаданых відаў. Але відавочна, што патэнцыял гэтага напрамку ў раёне вялікі і яго трэба настойліва развіваць.
Наталля БАГДАНОВІЧ
- На гэтым тыдні Прэзідэнт краіны падпісаў указ №420, якім карэкціруюцца правілы палявання. У адпаведнасці з ім можна будзе здабываць нават мядзведзя і рысь у асаблівым рэжыме, але ў асаблівым рэжымі, на падставе распрацаваных навукоўцамі планаў кіравання папуляцыямі. Рашэнне прынята, бо прыгаданай жывёлы ў лясах – у тым ліку і на Ушаччыне – стала прыкметна больш.
- Турысты ў Беларусі могуць паляваць і на зубра – праўда, такіх дазволаў за год выдаецца толькі 10. Жывёла знаходзіцца пад аховай, таму здабываюць яе разава і з рэзервовага фонду, а таксама старых і не надта здаровых асобін, ды і каштуе гэты прэстыжны эксклюзіў нятанна. Месцаў, дзе ладзяць такое паляванне, толькі тры, і адно – туркомплекс “Чырвоны бор” – знаходзіцца на Віцебшчыне.
