Прафесійнае свята аграрыяў ладзілася, як заўсёды, напярэдадні Дня работнікаў сельскай гаспадаркі і перапрацоўчай прамысловасці АПК. Працоўная субота аказалася для перадавікоў выхадным днём, якіх так нямнога выпала за чарговы сезон для механізатараў, вадзіцеляў, жывёлаводаў.
У касцюмах і прыгожых сукенках, апранаць якія даводзіцца яшчэ радзей, дэлегацыі прыбывалі ў раённы цэнтр культуры і траплялі ў стылізаванае фае.
Фотазон для здымкаў – на выбар. Хочаш – з кароўкай, хочаш – з кошыкамі з яблыкамі, кукурузай на фоне сланечнікаў ці з прыгожымі караваямі. Ды і экскурсія па
пляцоўках выставы аказалася інтэрактыўнай – віноўнікі свята частаваліся сапраўднай мінеральнай вадзіцай з вырабленай лясгасаўцамі крыніцай, хлебам па старадаўніх рэцэптах, маглі нават намалоць мукі. Васіль Рыгоравіч Алексяёнак з “Вялікадолецкага” так моцна раскруціў жорны, што нават прыпадняў камяні. Нездарма гэты аксакал аказаўся пераможцам адразу ў дзвюх намінацыях – хапае і вопыту, і сіл.
Дарэчы, дэлегацыя гэтага сельгаспрадпрыемства была самай прадстаўнічай не толькі за кошт пераможцаў спаборніцтва – ажно восем. КУСГП “Вялікадолецкае” адзначана ў дзвюх намінацыях – за колькасць нарыхтаваных кармоў (аж 59 цэнтнераў на кожную галаву іх вялікага статка) і за павелічэнне надояў, таму з’яўлялася яўным фаварытам свята. А Антон Уладзіміравіч Сафонаў аказаўся сёлета адзіным дырэктарам, які падымаўся на сцэну за калектыўнымі ўзнагародамі.
Не можа раён пахваліцца сёлета важкім караваем збожжавых, затое кукуруза на зерне дала 100 цэнтнераў з гектара. Выдатна спрацавалі з травяністымі кармамі ўсе гаспадаркі – і як вынік – 169 працэнтаў да ўзроўню мінулага года і 37 цэнтнераў на ўмоўную галаву жывёлы. Гэтыя лічбы агучыў старшыня райвыканкама С.С.Садоўскі, віншуючы аграрыяў. Ганаровыя граматы і Падзякі (у тым ліку і райсавета) ён уручыў сямнаццаці работнікам, пяцёра з іх – з “Сафійскіх дароў”. Паказальна, што да ўзнагарод кіраўніцтва гэтай гаспадаркі падавала не толькі яўных пераможцаў спаборніцтва, як занятага на корманарыхтоўцы Аляксея Атрашкевіча, але і ценявых, як повар Іна Ігнатовіч ці жывёлавод Ірына Шумчанка. Ну а самым шчаслівым на мерапрыемстве я б назвала Анатоля Петухоўскага з ЗАТ “Віцебскаграпрадукт”. Мужчына не хаваў свайго задавальнення ад таго, што ўпершыню трапіў на свята перадавікоў. Ды і падставу для гэтага меў самую што ні ёсць паважную. Прыгаданы ўзорны паказчык па кукурузе на зерне па раёне атрымаўся дзякуючы таварыству, участак якога на нашых землях сабраў ажно 124,5 цэнтнера з гектара. А за штурвалам сеялкі, “Тумана” на хімпраполцы і на ўборцы быў заняты ў тым ліку гэты малады механізатар.
Начальнік райсельгасхарча Юлія Міхайлаўна Ладнова працягвала ўрачыстую частку ўзнагароджваннем пераможцаў у розных намінацыях. Новых людзей на свяце можна было пералічыць па пальцах. Гэта маладыя спецыялісты: галоўны інжынер “Ільюшынскага” Андрэй Пятніца, які трэці год займаецца выпускам тэхнікі, механізатар “Сафійскіх дароў” Улад Асіпёнак, што толькі ў жніўні папоўніў калектыў. Для апошняга, як і для ветфельчара Яны Рэуцкай – гэта не толькі прызнанне іх добрасумленнага выканання абавязкаў, але і, безумоўна, аванс. Аднак пераважная большасць залы – тыя, хто штогод уздымаецца на раённую сцэну. Сярод іх даглядчыкі Васіль Бучынскі, Наталля Коршун і Ніна Усцін, камбайнеры Артур Карабань і Аляксандр Майсеенка, механізатары Генадзь Качан і Мікалай Хамёнак. Двойчы прымалі апладысменты сёлета Сяргей Філімонаў, Ра Вутх і Васіль Алексяёнак з “Вялікадолецкага”, Васіль Качан з “Глыбачан”, Аляксандр Бараўцоў з “Дземенца” і Аляксей Атрашкевіч з “Сафійскіх дароў”. З гонарам трымала ў руках чарговую бацькаву ўзнагароду малодшая дачка Міхаіла Ражноўскага. А Сяргей Міхайлавіч Вусько, які менш чым праз год зможа афармляць ільготную пенсію, прыгадаў конкурс маладых механізатараў, які больш 30 год таму праходзіў на базе “Арэхаўна”. Няма той гаспадаркі, як і “Новага жыцця”, гонар якога ён тады адстойваў. Але не было года, каб імя гэтага рупліўца не трапляла на старонкі “раёнкі”. Нічога не змянілася ў адносінах падобных работнікаў да сваёй зямлі. Абсалютна правільна сказаў на абласных “Дажынках” у Полацку Прэзідэнт: яны – самыя сапраўдныя патрыёты.
Зразумела, адзначыў ўзнагародамі сумленных працаўнікоў і прафсаюз работнікаў аграпрамысловага комплексу. Пярвічкі вылучалі тых, чыя праца не на такім відавоку, аднак без каго б не круціўся рухавік гаспадарак. Загадчык сектара эканомікі райсельгасхарча Таццяна Яўгенаўна Іванюта ўзнагародзіла загадчыка склада гаруча-змазачных матэрыялаў КУСГП “Вялікадолецкае” Віктара Алексяёнка, трактарыстаў КУСГП “Глыбачаны” Аляксандра Баратынскага і Аляксандра Малахава, жывёлаводаў ААТ “Ільюшынскі” Святлану Дземідовіч і Ніну Пяткевіч. Каштоўны падарунак атрымала і ветэран вытворчасці, былы эканаміст райсельгасхарча Валянціна Вячаславаўна Падвойская, якая сёлета святкавала юбілей.
На свяце аграрыяў падзякавалі прадпрыемствам раёна, якія дапамаглі людзьмі і тэхнікай. А каб пасеяць і сабраць вырашчанае, нараўне з аграрыямі працавалі дарожнікі, камунальнікі, кааператары, лесаводы, водаканальшчыкі. Кіраўнікі Ушацкага філіяла Віцебскага аблспажыўтаварыства Ганна Хамёнак, лясгаса Аляксей Апёнак і раённага цэнтра культуры Валянціна Грыневіч атрымалі падзякі яшчэ і за пляцоўкі, падрыхтаваныя да абласных “Дажынак”. Прыгаданыя ў пачатку артыкула фотазоны выстаўляліся ў Полацку і былі прызнаны аднымі з лепшых (4 месца).
Закончылася мерапрыемства выдатным канцэртам з танцавальнымі і сольнымі нумарамі, дзе падпявала ўся зала. Ну а назаўтра ў многіх з сённяшніх герояў нядзеля акажацца працоўнай, ім зноў круціць харчовы рухавік.
Вольга КАРАЛЕНКА.
