Ва Ушацкай райбальніцы падвялі вынікі работы пярвічнай прафсаюзнай арганізацыі і абралі новага лідара. Удзел у справаздачна-выбарнай канферэнцыі прынялі старшыня Віцебскай абласной арганізацыі Беларускага прафсаюза работнікаў аховы здароўя Уладзімір Плыткевіч, намеснік старшыні райвыканкама Генадзь Ягораў.
Членамі прафсаюза ў ЦРБ з’яўляюцца 332 чалавекі, або 97% ад агульнай колькасці працуючых. Работа прафкама ахоплівае самыя розныя накірункі – аздараўленне супрацоўнікаў, культурна-масавы, спартыўны, грамадскі кантроль за выкананнем заканадаўства аб працы і заработнай плаце. Не менш важная задача – згуртаванне калектыву, калі людзі аб’яднаны не толькі прафесійнай дзейнасцю, але і адпачынкам. Матэрыяльная дапамога са сродкаў прафбюджэту аказваецца ў сувязі з нараджэннем дзяцей, уступленнем у шлюб, лячэннем, а таксама са смерцю блізкіх людзей. Сёлета ў калектыў прыйшлі 11 маладых спецыялістаў, кожны з якіх атрымаў настаўніка, гатовага падзяліцца ведамі і вопытам. У вольны час супрацоўнікі райбальніцы актыўна ўдзельнічаюць у турпаездках, якія арганізуюцца прафкамітэтам. Для членаў прафсаюза штогод набываюцца квіткі на спектаклі, канцэрты, арганізоўваюцца мерапрыемствы з нагоды прафесійнага і іншых святаў. Для дзяцей ладзяцца ранішнікі, набываюцца навагоднія падарункі.
Калектыў райбальніцы даверыў прафсаюзнае лідарства ў новым перыядзе юрысконсульту ЦРБ Наталлі Віктараўне Кляпец (на здымку), якая змяніла на гэтай пасадзе вопытную і актыўную Марыну Генадзьеўну Харэвіч.
Абраны новы прафсаюзны лідар і ў раённым цэнтры гігіены і эпідэміялогіі. Ім стала Вольга Васільеўна Радзевіч. Была адзначана праца былога старшыні пярвічкі Алы Васільеўны Нікіценкі. Яна атрымала Падзяку ад Віцебскай абласной арганізацыі Беларускага прафсаюза работнікаў аховы здароўя.
Караліна КЛАЧОК.
