На Ушаччыне працягваецца акцыя “Дай лесу новае жыццё!”. Паўдзельнічаць у ёй на тэрыторыі розных лясніцтваў ужо паспелі работнікі цэнтральнай раённай бальніцы, педагогі і вучні Ушацкай, Глыбачанскай школ, наведвальнікі аддзялення для грамадзян пажылога ўзросту ТЦСАН, актывісты БРСМ.
На бягучым тыдні кіпелі справы на пашкоджаным ліпеньскім ураганам участку ля былога стадыёна Ушацкага лясгаса. “Маладыя елкі, дубы ды ясені тут неабходна пасадзіць амаль на трох гектарах зямлі”, – падкрэсліў дырэктар прадпрыемства Аляксей Мікалаевіч Апёнак, сустракаючы ў панядзелак шматлікіх памочнікаў. Да Дня бацькі паўдзельнічаць у рэспубліканскай акцыі вырашылі дэпутат абласнога Савета дэпутатаў, начальнік Віцебскага ўпраўлення МНС Сяргей Мікалаевіч Мялешкін, а таксама выратавальнікі з Ушач і абласнога цэнтра.
Падтрымалі такую ініцыятыву і некаторыя жыхары вуліцы Бабаедава. “Жыву тут ужо 35 гадоў – вось вырашыла насупраць дома міні-алею закласці”, – падзялілася з намі Валянціна Васільеўна Касяк.
Нагадаем: акцыя “Дай лесу новае жыццё!” завершыцца 12 лістапада. Усе жадаючыя паўдзельнічаць у ёй могуць звярнуцца ў лясгас ці бліжэйшае лясніцтва.
Кацярына КАВАЛЕЎСКАЯ.
