Ва Ушацкай школе прайшла незвычайная акцыя “Дзень выбару прафесіі”, арганізаваная супрацоўнікамі ўпраўлення ўнутраных спраў Віцебскага аблвыканкама і Ушацкага райаддзела міліцыі. Старшакласнікі атрымалі ўнікальную магчымасць больш даведацца пра службу ў органах унутраных спраў. Трэба сказаць, што аўдыторыя мерапрыемства незапланавана пашырылася за кошт малодшых вучняў, якія не змаглі прайсці міма вельмі цікавых пляцовак у фае.
Гэта акцыя адрознівалася ад іншых сустрэч з прадстаўнікамі розных прафесій дынамічнасцю і інтэрактыўнасцю. На выставе дзеці маглі зазірнуць у свет ДАІ, убачыўшы прыборы для вымярэння хуткасці, гістарычныя артэфакты – старыя рэгістрацыйныя знакі і пасведчанні кіроўцы. Юныя аматары экстрыму з цікавасцю аглядалі спецсродкі і зброю атрада міліцыі асобага прызначэння, з энтузіязмам «прымерылі» на сабе ролю стралка ў інтэрактыўным ціры. У актавай зале прагучала натхняльная прамова намесніка начальніка аддзела кадраў камплектавання Упраўлення ўнутраных спраў Віцебскага аблвыканкама Валерыя Вашкеля, які адзначыў важнасць удумлівага выбару прафесіі і падкрэсліў ролю абаронцы Радзімы, падзяліўся сваім вопытам службы. Начальнік штаба Ушацкага РАУС Святлана Ціханёнак распавяла аб парадку і ўмовах паступлення ва ўстановы адукацыі МУС і агучыла прахадныя балы мінулага года.
На цэнтральнай плошчы Ушач інспектары ДАІ расказалі дзецям пра дарожную бяспеку і падарылі флікеры.
Асаблівую цікавасць выклікала гісторыя выпускніка школы, цяперашняга ўчастковага інспектара Ушацкага РАУС Мікіты Вяр’ясава, які падзяліўся ўражаннямі ад навучання ў Акадэміі МУС і распавёў пра перспектывы службы. Завяршылася мерапрыемства яркім паказальным выступленнем амонаўцаў. “Дзень выбару прафесіі” ва Ушацкай школе стаў не проста інфармацыйным мерапрыемствам, а сапраўдным святам для вучняў.
Караліна КЛАЧОК.
