Глыбачанскі
З гравійкі – у асфальт
Шмат было нараканняў на палатно па вуліцы Цэнтральнай аграгарадка Глыбачка. І распачатае раней асфальтаванне працягнулася згодна планаў ДРБУ-105, якое вядзе капітальны рамонт дарог на тэрыторыі сельсавета. Новы слой пралёг не толькі па цэнтры аграгарадка, але і да вёскі Краснае, такім чынам участак ад скрыжавання шашы Ушачы-Глыбачка пераведзены ў больш высокі статус – з гравійкі ў асфальтаваную.
Жарскі
Даплата за зямлю
Каля 25 парушэнняў зямельнага заканадаўства было выяўлена падчас інвентарызацыі ўчасткаў. Большасць жыхароў перанеслі парнікі і агароджы з “захопленай зямлі”, а дзесяць чалавек зараз звярнуліся за легалізацыяй. Такі варыянт задаволіць і іх, і сельсавет, на рахунак якога паступіць даплата за лішнія метры, пасля таго як спецыялісты “Белгіпразема” зацвердзяць новыя межы. Частка заяўнікаў – з вёскі Вашкова, у якой самы высокі кадастравы кошт па сельсавеце.
Вяркудскі
Лёгкае ацяпленне
Замена ліній электраперадач зараз вядзецца ў прыазёрнай вёсцы Пола, пасля чаго энергетыкі зоймуцца такімі ж “дачнымі” Навасёлкамі і Малінаўкай. Ну а 14 жыхароў Матырына ўжо задавальняюць сваё жаданне на электраацяпленне – атрымалі тэхнічныя характарыстыкі – яны пасля рэканструкцыі “станоўчыя” для ўсіх жадаючых населенага пункта.
Кубліцкі
Лепей за былую
Пасля ўрагану не ўтрымалася альтанка з полікарбанату, што ўстанавілі некалькімі гадамі раней у цэнтры вёскі Рыбакі. Засталіся толькі стол ды лаўкі, якім надалі свежы выгляд. Новую змайстравалі старэйшына вёскі Пётр Сцяпанавіч Машчонак і нязменны памочнік у добраўпарадкаванні Віктар Пятровіч Мялешка. Прычым, улічылі на гэты раз і напрамак ветру – “зашылі” альтанку з боку возера.
Дзе гэта вуліца, чый гэты дом
Таблічкі з нумарацыяй дамоў з’явіліся ў вёсках Баяршчына, Загуззе, Рыбакі. Набыты яны за сродкі самаабкладання жыхароў. А вось адзін з пустуючых дамоў у аграгарадку Кублічы хутка набудзе гаспадароў, паколькі судом прызнаны вымарачнай спадчынай і яго можна выкупіць за базавую велічыню. Узаконеная такім чынам хата ў Зерчаніцах пойдзе пад знос. Усяго сельвыканкамам у рэестр незанятых уключана 197 дамоў.
Ушацкі
Зусім маленькая вёсачка Заазер’е. Але якой ажыўленай становіцца ўлетку, як любяць яе нашчадкі былых карэнных жыхароў. Тут збіраюцца іх дзеці, унукі, а таксама дачнікі, што абралі гэты райскі куток Ушаччыны для свайго летняга пражывання. А самы любімы агульны адпачынак, канечне, свята вёскі (на здымку).
Падрыхтавала Вольга КАРАЛЕНКА.
