Жыхар Сарочынскага сельсавета вырашыў пабудаваць сабе навес – справа годная, ды толькі прыглядзеў ён для гэтага дзве бярозкі, што раслі ў вёсцы (на здымку).
Прыродаахоўнікі змерылі дыяметры пнёў і разлічылі нанесеную прыродзе шкоду ў памеры 480 рублёў – пакрыў “дрывасек” яе добраахвотна, а так бы яшчэ і штраф атрымаў. Ды ўсё роўна дарагавата пабудова абышлася. Цікава, што ў невялічкай вёсцы падобны факт ужо фіксаваўся пазалетась – ды, відаць, навукай жыхарам не стаў.
Не менш павучальны выпадак адбыўся і ва Ушацкім сельсавеце. Тут, праўда, намеры ў парушальніка прыродаахоўнага заканадаўства былі “добрыя”: хваляваўся, што аварыйная (на яго думку) вярба, якая расце за плотам, зваліцца на хату. Пусціў дрэва на дровы – і атрымаў 5 базавых: за такую суму яму б цэлы прычэп прывезлі. І не трэба было б рукамі разводзіць ды распавядаць інспектарам пра “хацеў як лепш”, каб дзейнічаў па законе: звярнуўся ў сельвыканкам, работнікі якога атрымалі б заключэнне спецыялістаў і далі афіцыйны дазвол вярбу спілаваць.
Былі выяўлены і два выпадкі незаконнага выдалення раслінных аб’ектаў у гарпасёлку. У гэты раз правінілася юрыдычная асоба: штраф і пакрыццё шкоды пацягнулі амаль на паўтары тысячы рублёў.
