10 кастрычніка на сцэне раённага цэнтра культуры з новай канцэртнай праграмай выступіць знакаміты беларускі выканаўца Аляксандр Саладуха. Спяваць для ўшачан ён будзе неўпершыню. Чым збіраецца ўразіць гледачоў самы жыццярадасны артыст беларускай сцэны? Пра гэта і іншае мы пацікавіліся ў спевака, а ён з задавальненнем даў інтэрв’ю раённай газеце.
– Аляксандр, наўрад ці знойдзецца чалавек, які б не ведаў слоў з песень “Здравствуй, чужая милая”, “Вінаград”, чым будзеце здзіўляць гледачоў на канцэрце?
– Прадстаўлю ўшачанам новую праграму “Мы жывыя” ў рамках прэзентацыі майго ўжо 14-га сольнага альбома. У яго ўвайшло 12 кампазіцый. Яны прагучаць у першым аддзяленні канцэрта. Яго ўпрыгожаннем стане навінка – кампазіцыя “Я такі адзін”. Будуць прадстаўлены прэм’еры – “Рассвет”, “Грай, музыкант!”, “Хлеб”. Дарэчы, апошняя песня на беларускай мове набірае папулярнасць і вельмі добра ўспрымаецца публікай. У другім аддзяленні слухачоў, як заўсёды, чакаюць залатыя хіты з папярэдніх альбомаў. З гэтай праграмай аб’ехалі ўжо больш сотні гарадоў Беларусі, канцэрт ва Ушачах будзе 109-м.
– Хто з Вамі яшчэ выступіць на ўшацкай сцэне?
– У перапынку паміж аддзяленнямі на сцэну выйдзе малады аўтар і выканаўца Цімур Прахін. Доўгія гады гэтая роля адводзілася маім сынам Аляксандру і Антону, якія выступаюць у складзе групы “Элемент”. На гэты раз мы вырашылі паэксперыментаваць і запрасілі Цімура. Ён сам піша вершы і музыку, з’яўляецца аўтарам большасці песень маіх сыноў. І ведаеце, эксперымент аказаўся ўдалым. Артыста ўсюды прымаюць на “ўра”.
– Вы заўсёды падкрэсліваеце, што не падзяляеце гледачоў малой і вялікай сцэны.
– Я працую для людзей, незалежна, колькі ў зале іх знаходзіцца – няхай гэта будзе некалькі чалавек за сталом або 50 тысяч на плошчы. І выкладваюся аднолькава: па-іншаму не ўмею. Гледачы ўсё адчуваюць і бачаць, асабліва ў глыбінцы. Апошні раз ва Ушачах выступаў роўна тры гады таму. Падчас канцэрту адчуў недамаганне, але адпрацаваў як трэба да канца. Калі ты аддаеш усё, тады і ўзнагарода прыходзіць у выглядзе шчырых апладысментаў і слоў удзячнасці. Дарэчы, пасля канцэрта, як заўсёды, з задавальненнем дам аўтографы і зраблю фота на памяць з кожным жадаючым. У мяне ёсць традыцыя: не пакідаю фае да таго часу, пакуль там знаходзяцца гледачы.
– Чым займаецеся акрамя канцэртнай дзейнасці?
– 1 сакавіка споўнілася 37 гадоў маёй працы на прафесійнай сцэне і 32 гады, як я выконваю хіт “Здравствуй, чужая милая”. Колькі разоў я пабываў з канцэртамі ў кожным са 120 гарадоў Беларусі за гэты час, я ўжо не бяруся лічыць. Удзельнічаю ў шматлікіх святах і тэлевізійных праектах – “Фактар.by”, “Сэнс жыцця”, “Добры вечар”, ужо атрымаў запрашэнне на навагодняе выступленне ў санаторыі “Ружанскі”.
– У Вас столькі энергіі, адкуль чэрпаеце сілы і натхненне?
– Натхняе мая сям’я, мае гледачы, займаюся спортам. Увогуле маё жыццёвае крэда – нельга сядзець склаўшы рукі і чакаць выпадковага поспеху, само нічога не прыйдзе, трэба працаваць. Я люблю жыццё, сцэну і сваю прафесію. Ад усёй душы жадаю ўшачанам шчасця, здароўя, поспеху, любові. Запрашаю на канцэрт – добры настрой і пазітыў гарантую!
Гутарыла Вольга КАМАРКОВА.
