Рамонт дарог, саманарыхтоўка дроў, выдаленне аварыйных дрэў, добраўпарадкаванне. Такой была тэматыка пытанняў, якія ўшачане задавалі члену Савета Рэспублікі Нацыянальнага сходу Рэспублікі Беларусь, старшыні Ушацкага раённага Савета дэпутатаў Наталлі Мікалаеўне Марковіч падчас правядзення прыёму грамадзян і “прамой тэлефоннай лініі”.
Адразу два звароты – з Кубліцкага і Вялікадолецкага сельсаветаў датычыліся ямачнага рамонту дарог. Прычым, у другім выпадку не толькі прасілі дапамагчы, а і дзякавалі за выкананы вялікі аб’ём работ ля Глінішча. Тэлефанаванне з Мосара датычылася ўборкі аварыйнага дрэва на мясцовых могілках. Жыхар Вяркуд заўважыў, што барацьба з баршчэўнікам у раёне дала плён: апрацаваныя ўчасткі прыкметна пачысцелі, але на некаторых вырастае іншая шкодная трава, якую таксама трэба абкошваць, каб тэрыторыя заставалася дагледжанай і добраўпарадкаванай.
Таксама ўшачане звярталіся да сенатара наконт падаткаабкладання.
“Дапамога ў вырашэнні праблем грамадзян застаецца для нас адным з прыярытэтных напрамкаў дзейнасці, на гэта пастаянна ўказвае Прэзідэнт”, – адзначыла Наталля Мікалаеўна. – На нядаўняй нарадзе, на якой былі разгледжаны пытанні ўнутрыпалітычнага жыцця нашай краіны, кіраўнік дзяржавы яшчэ раз акцэнтаваў увагу на рабоце з насельніцтвам. Сёння, калі ідзе інфармацыйная атака на нашу краіну, мы павінны размаўляць з людзьмі. Гэтаму спрыяюць сустрэчы, якія мы праводзім, прыёмы грамадзян. Усе паступіўшыя да мяне пытанні ўзяты на кантроль”.
Вольга КАМАРКОВА.
