“А ўсё ж якую трапную назву падабралі для спарткомплексу “Юнацтва-Ушачы”. 540 гадоў – гэта толькі пачатак развіцця, і мы бачым, як пераўтвараецца, прыгажэе райцэнтр!” З меркаваннем намесніка старшыні Віцебскага аблвыканкама Вячаслава Дурнова цяжка не пагадзіцца. Тым больш што выказаў ён яго падчас адкрыцця яшчэ аднаго цудоўнага аб’екта – інтэрната для спартсменаў. Менавіта з гэтай прыемнай падзеі стартаваў Дзень горада, які ўпершыню праводзіўся ва Ушачах.
Новы будынак і гарадскі інтэр’ер упрыгожыў, і нашы магчымасці больш эфектыўна развіваць спартыўную галіну павялічыў. А яго ўзвядзенне – гэта гісторыя аб тым, што немагчымае магчыма. Ад смелай ідэі, якую агучыў на прыёме ў нашага тагачаснага дэпутата ў беларускім парламенце Уладзіміра Паўлавіча Андрэйчанкі загадчык сектара спорту і турызму райвыканкама Сяргей Ціханёнак, да моманту пераразання сімвалічнай стужкі прайшло не так шмат часу, але колькі людзей аб’ядналі намаганні, каб увасобіць праект у жыццё! Сваю лепту ўнеслі старшыня Віцебскага аблвыканкама Аляксандр Субоцін (дарэчы, кіраўнік рэгіёна даслаў удзельнікам свята віншавальны адрас), прадпрыемства “Квант-Праект”, работнікі Шумілінскай ПМК-70 і іх ушацкая калегі, іншыя арганізацыі, а таксама жыхары райцэнтра, якія шчыравалі на аб’екце падчас суботнікаў – усім ім шчыра падзякаваў у сваёй прамове старшыня райвыканкама Сяргей Садоўскі.
І вось ганаровыя госці ўрачыстасці ладзяць першую экскурсію па будынку. Каштавала яго ўзвядзенне 9,3 мільёна рублёў, аднак мяркуецца, што ўкладанні паступова акупяцца, бо аб’ект дазволіць у поўным аб’ёме задзейнічаць патэнцыял спарткомплексу, больш дынамічна развіваць турыстычную сферу.
За бягучы год ва Ушачах было праведзена 14 збораў, прычым у 8 выпадках да нас прыязджалі спартсмены з Расійскай Федэрацыі. Аднак многім давялося адмовіць з-за дэфіцыту месцаў для пражывання. Цяпер жа іх колькасць павялічылася на 60 – менавіта на столькіх гасцей разлічаны камфортныя пакоі інтэрната. Ужо гатова частаваць спартсменаў смачнымі стравамі (у тым ліку і беларускай кухні) кафэ з летняй тэрасай. Хоць зараз можна запускаць машыны ў пральні, аднаўляць сілы ў СПА-комплексе. Увесь спектр паслуг прапануе гасцям турыстычны інфармацыйны цэнтр Ушацкага раёна.
На працяглы час экскурсанты затрымаліся на цокальным паверсе – менавіта там размясціўся самы сучасны на Віцебшчыне цір.
“Калі мяне абралі на пасаду старшыні Беларускай федэрацыі стралковага спорту, паставіў перад сабой мэту аб’ехаць усе кропкі Беларусі, дзе развіваецца гэты від. Тады ўпершыню завітаў ва Ушачы – і быў прыемна здзіўлены, калі ўбачыў сапраўдны еўрапейскі гарадок – дагледжаны, сучасны. Ведаў і пра поспехі выхаванцаў аддзялення кулявой стральбы вашай СДЮШАР – таму горача падтрымаў ідэю абсталяваць у райцэнтры цір”, – падзяліўся з намі яшчэ адзін ганаровы госць свята Сяргей Дудко, які, дарэчы, прыбыў на наваселле з падарункамі: спецыяльным абуткам для юных стралкоў.
У ціры не будзе звыклых папяровых мішэняў і трубы, праз якую трэнер разглядвае трапнасць стрэлаў. Устаноўкі электронныя, а вынікі адразу адлюстроўваюцца на маніторах. Варта адзначыць, што гэта першы аб’ект у нашай краіне, аснашчаны айчынным абсталяваннем, устанавіла якое ТАА “ФораАп”. Развіваць тут плануюць не толькі алімпійскія віды, а і прыкладную стральбу, якая зараз набірае папулярнасць у свеце. Яе сэнс – дакладна і хутка страляць па розных мішэнях з пісталета, карабіна і іншай зброі. Канечне, адмовіцца ад прапановы апрабаваць абсталяванне было проста немагчыма. Вячаслаў Дурноў правёў выдатную стралковую сесію, а член Савета Рэспублікі Нацыянальнага сходу Рэспублікі Беларусь, старшыня Ушацкага райсавета Наталля Марковіч даказала, што зброя арганічна выглядае і ў жаночых руках.
У хуткім часе мы пабываем на трэніроўках юных спартсменаў і раскажам пра наш новы аб’ект падрабязней. Мяркуецца, што займацца стральбой тут змогуць усе жадаючыя – пра гэта пазней распавядзем асобна, як і пра магчымасць браніраваць для пражывання вольныя нумары інтэрната, наведваць тутэйшае кафэ, СПА-комплекс, карыстацца пральняй.
Прыгожым завяршэннем гэтай часткі Дня горада стала пасадка перад будынкам сімвалічнай Алеі спорту. А яшчэ ў рамках свята прайшло некалькі спаборніцтваў: аматары гульні нумар 1 з Ушач, Полацка і Чашнікаў выяўлялі пераможцаў на футбольным полі, юныя дзюдаісты і плыўцы ладзілі адкрытыя першынствы адпаведных аддзяленняў СДЮШАР.
Турнір апошніх стаў найбольш прадстаўнічым, бо на водных дарожках разам з ушачанамі змагаліся спрынтары з суседніх гарадоў. І вельмі прыемна было ўбачыць на п’едэстале нашых землякоў. “Золатам” парадаваў балельшчыкаў лідар каманды Аляксей Салодкін і атрымаў падарунак ад грамадскага аб’яднання “Белая Русь”. Не засталіся без медалёў і “ўшацкія лепяльчане” Аліса Папова і Дзяніс Аўтушка. Мы ж запыталіся ў іх бацькоў Іны і Міхаіла, ці зменяцца планы наконт трэніровак дзяцей на нашым комплексе пасля нядаўняга адкрыцця ў іх горадзе спартыўнага цэнтра з басейнам. Адказ уразіў: “Не! Мы не хочам развітвацца з “Юнацтвам- Ушачы” і выдатным трэнерам Вікторыяй Лукашэвіч, таму па-ранейшаму будзем прыязджаць на заняткі!” Думаецца, лепшага кампліменту нашай установе і не прыдумаеш.
Спартыўная галіна ва Ушачах дынамічна развіваецца – і далей будзе толькі цікавей!
З фізкультурна-аздараўленчага комплексу святкаванне перамясцілася на цэнтральную плошчу, дзе разгарнуліся інтэрактыўныя пляцоўкі прадпрыемстваў і арганізацый раёна. Яны не проста рыхтавалі выставы, паказваючы свае дасягненні, а ўдзельнічалі ў конкурсе “Табе, любімы горад!”, які праводзіўся ў розных намінацыях. Асабліва прыцягвала ўвагу цэлая кампазіцыя цэнтра па забеспячэнні дзейнасці бюджэтных арганізацый. “Хацелася чымсьці здзівіць землякоў, у працэсе абмеркавання ідэі ўсе так захапіліся, што для афармлення фотазоны ў стылі СССР неслі з дому розныя рэквізіты кшталту самавараў, дываноў, крэслаў, карцін і піянерскага барабана”, – расказвае дырэктар Цэнтра Т.Глінская. А яшчэ прама на плошчы работнікі дэманстравалі эвалюцыю бухгалтарскай работы – ад ручных лічыльнікаў да ноўтбукаў. Дарэчы, старанні калектыву былі адзначаны першым месцам у конкурсе. Не толькі аказвалі меддпамогу, змяралі ціск, кісларод і цукар на пляцоўцы ЦРБ, а і не давалі сумаваць, прапануючы ўсім цікавыя гульні. Да кропак банкіраў запрашалі талісманы Агрык і Грошык, акунуцца ў гісторыю і творчасць можна было на пляцоўцы музея, бібліятэкі і школы мастацтваў.
Адгукнуліся ўшацкія прадпрыемствы і на заклік паўдзельнічаць у конкурсе на лепшую архітэктурную форму, якая адпаведна будзе падорана гораду. Напрыклад, сувязісты пачаравалі над веласіпедам і ператварылі яго ў падстаўку для кветак, “Лясныя азёры” вырабілі пад заказ каваную лавачку з назвай і датай заснавання гарпасёлка. Пастараліся ўшацкія газавікі, змайстраваўшы ўласнымі сіламі лаўку, асновай для якой паслужылі… балоны! У ліку першых яе ацанілі сённяшні кіраўнік прадпрыемства Андрэй Залеўскі і былы – Уладзімір Малаткавец. За арыгінальнасць газавікам і была прысуджана перамога ў адпаведнай намінацыі. Майстры лясгаса, вядома ж, вырабілі лавачку з дрэва, аздобіўшы яе прыгожымі грыбочкамі. Дзе будуць устаноўлены цудоўныя падарункі, мы паведамім чытачам пазней.
А яшчэ на плошчы ў суботу разгарнуўся смачны конкурс. Установы культуры і адукацыі раёна спаборнічалі ў прэзентацыі страў з “другога хлеба” “БУЛЬБА-батл”. Ох, і складана было выбраць самыя лепшыя стравы! Чаго тут толькі ні было – дранікі, клёцкі, бульбяныя пончыкі… “Адзін жыхар нашай краіны ў сярэднім з’ядае 160-165 кілаграмаў бульбы ў год, таму ідэя конкурсу-прэзентацыі вельмі ўдалая. Хоць і шмат гатую дома для родных, многія рэцэпты ўзяла на карандаш. Цяпер у маім меню з’явіцца бульбяны торт”, – падзялілася старшыня раённага аб’яднання прафсаюзаў М.Шаўчэнка, якая ўзначальвала журы конкурсу. Ацанілі старанні ўдзельнікаў і ўшачане, і госці райцэнтра. Не будзем казаць, хто стаў пераможцам – усе малайцы, няўдзячная гэта справа выбіраць лепшае са смачнага, тым больш што густы ва ўсіх розныя.
Цэлы марафон канцэртаў ладзіўся ў гэты дзень, старт яму далі творчыя калектывы і самадзейныя артысты раёна. Аматараў народнай музыкі і танцаў сабралі “Ушацкі разгуляй” і полацкая “Заманіха”. А ўвечары на ўсё наваколле гучалі знакамітыя хіты ў выкананні папулярнага беларускага рэтра вумен трыа “Ружовыя ружы”. Мала хто змог уседзець у глядацкім крэсле і не падтанцоўваць. Настрой ва ўшачан быў выдатны, а гэта значыць, што першае свята гарпасёлка ўдалося!
Наталля БАГДАНОВІЧ,
Вольга КАМАРКОВА.
