Ва Ушацкім лясгасе вельмі шмат сумленных работнікаў, сапраўдных прафесіяналаў. Як заўсёды падкрэслівае дырэктар прадпрыемства Аляксей Мікалаевіч Апёнак, працу кожнага цэняць і паважаюць. Але самым тытулаваным работнікам з багатым стажам, бясспрэчна, з’яўляецца ляснік Ушацкага вопытна-вытворчага лясніцтва Пётр Пятровіч Качан. На яго рахунку ўзнагароды як раённага ўзроўню, так і медаль “За працоўныя заслугі”. Хоць не раз быў героем газетных публікацый, да сёлетняга прафесійнага свята зноў з’явілася нагода сказаць некалькі слоў пра заслужанага лесніка.
На гэтым тыдні на ўрачыстым мерапрыемстве з нагоды Дня работнікаў лесу ў Віцебску Пётр Пятровіч атрымаў нагрудны знак “30 гадоў бездакорнай службы ў дзяржаўнай лясной ахове Рэспублікі Беларусь”. А ў чацвер быў запрошаны на ўрачыстасць у сталіцу, дзе яму была ўручана Падзяка кіраўніка Адміністрацыі Прэзідэнта Рэспублікі Беларусь.
На працягу больш чым 40 гадоў ён бездакорна выконвае свае прафесійныя абавязкі. За Пятром Пятровічам у лясніцтве замацаваны абход нумар 4, а гэта плошча ажно ў 739 гектараў! 128,7 з іх – тэрыторыя біялагічнага заказніка “Вечалле”. Такія вялізныя ўчасткі, здаецца, нават уявіць складана, а мужчына выдатна ведае кожны куточак гэтага лесу. І з задавальненнем дзеліцца сваім вопытам з маладымі лесаводамі, якія прыходзяць працаваць у лясніцтва. Сам не ўяўляе сябе без лесу і імкнецца прывіваць любоў да прыроды падрастаючаму пакаленню падчас сустрэч са школьнікамі і ўдзельнікамі дашкольнага лясніцтва “Лесавічок”.
Калісьці ў пачатку сваёй кар’еры працаваў трактарыстам і вадзіцелем, а работу лесніка выконвае роўна 30 гадоў, да якой, як прызнаецца, ляжыць душа. Ён увогуле з тых, хто не любіць нешта мяняць: трывала стаіць на нагах і даражыць тым, што мае.
Да прафесійнага свята высокімі ўзнагародамі былі адзначаны і іншыя работнікі лясгаса. Ганаровая грамата Міністэрства лясной гаспадаркі ўручана вадзіцелю на вывазцы лесу Пятру Іванавічу Палонскаму. Яго калега Віктар Уладзіміравіч Калачоў, а таксама вальшчык лесу Леанід Карабань і майстар лесу Леанід Сяргеевіч Шайтар атрымалі Ганаровыя граматы абласнога лесагаспадарчага аб’яднання. Падзяка генеральнага дырэктара Віцебскага ДВЛГА аб’яўлена кіраўніку прадпрыемства А.М.Апёнку.
