1 верасня скончыўся прыём заявак на ўдзел у 23-м конкурсе “Лепшыя тавары Рэспублікі Беларусь”, які штогод праводзіцца па ініцыятыве Дзяржстандарта і аблвыканкамаў. За гэты час яго лаўрэатамі сталі дзясяткі тысяч узораў айчыннай прадукцыі. Пераможцаў вызначае кампетэнтнае журы, але ўплываць на вынік могуць і спажыўцы праз галасаванне на сайце. А якія беларускія тавары і брэнды вылучылі б на падобны конкурс нашы чытачы? Палічыўшы, што ў Год якасці абмеркаваць такую тэму будзе асабліва дарэчы, мы прайшліся па райцэнтры і задалі адпаведныя пытанні прадаўцам і пакупнікам.
Гаспадыня папулярнай прыватнай крамы “Аліна” любімы тавар сваіх наведвальнікаў агучыла без ваганняў – вядома ж, пельмені “Уральскія новыя” Бярозаўскага мясакамбіната. “У летнія дні, калі ў раён прыязджала шмат дачнікаў, бывала, што за тыдзень разыходзілася па 300 кілаграмаў. Нават вадзіцелі-дальнабойшчыкі затарваліся, каб харчавацца ў паездках па Еўропе. Карыстаюцца попытам і каўбасы, рулеты, іншая бярозаўская прадукцыя, таму супрацоўнічаю з гэтым брэндам ужо доўгі час”, – падзялілася з намі Аліна Крацёнак.
А вось ушачанка Надзея Апёнак аддала свой голас за вырабы Брэсцкага мясакамбіната – у прыватнасці, сасіскі “Доктарскія” і “Малочныя”. “Набываю іх у “Санце” і “Еўраопце”. Смак натуральны і кошт прымальны – каля 11 рублёў”.
Жыхар Мосара Сяргей Куляшоў прагаласаваў за полацкую малочку, сярод якой вылучыў смятану “Сафійка” 26% тлустасці. “Ніколі не расчароўвае і маянэз “Правансаль Сталічны” брэнда “Камака”, – дадаў мужчына.
“Камунарку” назвалі самым годным айчынным брэндам ушачанкі Таіса Вайтулевіч і Вольга Шаблоўская. На прадпрыемстве выпускаюць каля 300 найменняў вырабаў і штогод распрацоўваюць парадка 20 навінак. Адну з нядаўніх – цукеркі пратэінавыя без цукру – вылучыла Таіса Гур’янаўна, а Вольга Іосіфаўна аддала свой голас за горкі шакалад. З прамысловай групы жанчыны назвалі кампанію “Світанак”, у прыватнасці, трыкатажныя футболкі, бялізну, начныя кашулі.
“Вызначыць лепшы харчовы тавар вельмі складана! – прызналася нам Дзіна Садоўская. – Але назаву, напэўна, чырвоную рыбу “Санта Брэмар”. Гэты беларускі брэнд старанна клапоціцца пра свой імідж, праводзіць не толькі стандартныя, а і дадатковыя праверкі якасці, і паказальны той факт, што наша марка з’яўляецца адным з лідараў попыту ў Расіі, дзе шмат уласных рыбаперапрацоўчых кампаній. Што датычыцца прамысловых тавараў, то тут па-за канкурэнцыяй беларускі лён. А ў якасці адметнай вылучу сёлетнюю калекцыю летняга адзення для ўсёй сям’і кампаніі “Mark Formelle”. Блузкі, сарафаны, шорты вельмі стыльныя і камфортныя, пры гэтым тканіна стала менш мяцца, так што высокую ацэнку брэнду хачу паставіць не толькі ад сябе, а і ад раённай арганізацыі Беларускага саюза жанчын, якую ўзначальваю”.
Уладальніца крамы “Прэстыж” Святлана Свяжынская “таварам года” назвала свежую лінейку элегантных сукенак і касцюмаў гродзенскай кампаніі “Нэл-мода” – у іх, дарэчы, сустрэлі Дзень ведаў некаторыя ўшацкія педагогі. А гаспадар магазіна “КАМПіТЭЛ” Арцём Лапёнак – бытавую тэхніку беларускай кампаніі “АRESA”: “На нашых паліцах даволі шырокі асартымент гэтага брэнда. Ушачане ахвотна набываюць сокавыціскалкі, электрамясарубкі, кухонныя камбайны, фены і многае іншае – і нараканняў на якасць практычна не бывае”.
Ну а самы юны ўдзельнік апытання Глеб Хамёнак (на здымку) нічога не сказаў. Аднак красамоўна прагаласаваў за кобрынскую фабрыку “Палессе”, калі дэманстраваў нам сваю любімую машынку.
Спадзяемся, што наша падарожжа ў свет годнай айчыннай прадукцыі вас зацікавіла. Калі так – то прапануем працягнуць вылучэнне лепшых вырабаў і падзяліцца з намі сваімі “фаварытамі”.
Беларусь пастаўляе свае тавары амаль у 200 краін свету. Асноўнымі нашымі гандлёвымі партнёрамі з’яўляюцца Расія, Кітай, ААЭ, Германія, Польшча, Турцыя, Казахстан, Бразілія, Італія, Узбекістан, Літва, Індыя.
Наталля БАГДАНОВІЧ.
