Цікавы падарунак для сваіх актывістаў – экскурсійную паездку ў Мінск і, у прыватнасці, наведванне музея “Аліварыя” – падрыхтавала раённая арганізацыя Беларускага прафсаюза работнікаў культуры, інфармацыі, спорту і турызму. Ушачане мелі магчымасць разабрацца ў тонкасцях вырабу старадаўняга напітку і паглядзець на працэс вытворчасці знутры.
Экскурсія пачалася (зрэшты, як і закончылася) з карпаратыўнага музея “Аліварыя”, размешчанага недалёка ад цэнтра Мінска на вуліцы Кісялёва, 30. Выставачная зала адрозніваецца ад звыклых: гэта камбінацыя гістарычных экспанатаў з барнай стойкай, сталамі для дэгустацый, сцены ўпрыгожаны партрэтамі заснавальнікаў, старадаўнімі дакументамі, дзіўнымі піўнымі бутэлькамі, этыкеткамі.
Як даведаліся, 150-гадовая гісторыя завода пачалася з ініцыятывы мінчанкі Рохлі Фрумкінай, якая пасля вучобы піваварству ў Еўропе вырашыла і ў беларускай сталіцы пабудаваць свой бровар, тады драўляны. Новая эпоха пачалася, калі ўладальнікам стаў граф Караль Ян Чапскі, па сумяшчальніцтве яшчэ і Мінскі гарадскі кіраўнік. З ім быў пабудаваны новы корпус, мадэрнізавана абсталяванне, праведзены электрычнасць і тэлефон. А з часоў яго паслядоўнікаў – сям’і Лекертаў – захаваліся цікавыя дакументы і правілы распарадку з пералікам штрафаў за правіннасці. Напрыклад, піва работнікі маглі піць толькі ў канцы дня і выключна на тэрыторыі завода, забаранялася брыдкасловіць і быць неахайна апранутым. У савецкія часы на заводзе выраблялася каля 1 мільёна дэкалітраў піва ў год. Дарэчы, не спыняў ён сваю работу нават у ваенны час – немцы пастаўлялі напой для сваіх салдат, а за любое пашкоджанне вытворчага працэсу расстрэльвалі. Сёння ж “Аліварыя” ўваходзіць у склад кампаній “Carlsberg Group”. Нягледзячы на санкцыі, ёсць магчымасць не толькі вырабляць лакальныя гатункі, але і прадстаўляць міжнародныя брэнды. Актыўна выкарыстоўваецца навуковы патэнцыял і лепшыя практыкі кампаніі. Так, піўныя дрожджы прыязджаюць у Мінск з Даніі. Менавіта ў Капенгагене сёння знаходзіцца адна з самых буйных і лепшых у свеце лабараторый для работы з імі.
“Не скажу, што з’яўляюся прыхільніцай піва, аднак пабываць на “Аліварыі” – прычым, сімвалічна ў Год якасці – было вельмі цікава! – падзялілася з намі супрацоўніца Дома рамёстваў Крысціна Кляшчонак. – Не ведала, што яго трэба піць, пачынаючы з глыбокага ўдыху, смакуючы 20-30 секунд, выбіраючы асаблівыя куфлі для кожнага гатунку – каб адчуць, знайсці падыход. А можна рабіць гэта з шакаладам, які падкрэслівае саладзінку ці, наадварот, гарчынку напою”.
Удзельнікі экскурсіі пабывалі ў вытворчых цэхах, пры гэтым сустрэлі толькі аднаго работніка: аказваецца, увесь працэс піваварства даўно аўтаматызаваны. Нават цяжка ўявіць, якую фізічную сілу трэба было б прыкласці, каб справіцца з чатырохпавярховымі варачнымі катламі.
У выставачнай зале ёсць унікальны экспанат, адзіны ў Беларусі і СНД, – кола водараў (на здымку). Тут прадстаўлена 14 самых распаўсюджаных пахаў, якія сустракаюцца ў піве: банан, чырвоны яблык, падсмажаны хлеб, кава, ваніль. Цікава, што яны ўтвараюцца ў працэсе натуральнага прыгатавання, без дадання “хіміі”.
Пасля лікбезу па працэсе піваварства пачалося не менш цікавае – дэгустацыя. Зрэшты, прапаноўваюцца тут і безалкагольныя варыянты пеннага напою.
Калі гэтак жа хочаце пабываць на экскурсіі ў “Аліварыі”, запісвайцеся на сайце завода. Важная ўмова – наяўнасць удзельнікам групы 18 гадоў. І некалькі карысных падказак: жанчынам лепш адмовіцца ад высокіх абцасаў, а ў халодную пару варта апранацца цяплей, бо частка экскурсіі праходзіць на адкрытым паветры.
Кацярына КАВАЛЕЎСКАЯ.
