“Круты быў час: столькі эмоцый атрымаў!”. – “Адразу нават не ўспомню ўсяго, што перажыў”. Такі інтрыгуючы дыялог пачулі днямі ля рэдакцыі. Як стала пазней зразумела, так школьнікі расказвалі адзін аднаму аб праведзеным леце.
Думаецца, гэта найлепшая адзнака аддзелу па адукацыі райвыканкама, які падчас канікул арганізоўваў на Ушаччыне аздараўленчую кампанію для навучэнцаў. Усе тры месяцы навучальныя ўстановы, сапраўды, не пуставалі – працавалі дзённыя лагеры, а таксама працы і адпачынку. Даспадобы аказаліся дзецям профільныя летнікі, у ліку якіх – турысцка-краязнаўчы і ваенна-патрыятычныя (у рабоце апошніх, дарэчы, прымалі ўдзел супрацоўнікі райаддзелаў міліцыі і па надзвычайных сітуацыях). 141 школьніка з нашага раёна, 15 юнакоў і дзяўчат з Мінска сабрала сёлета “Турасполле”, дзе ўпершыню прайшло не тры, а чатыры змены.
Шматлікія экскурсіі, творчыя і спартыўныя спаборніцтвы, цікавыя сустрэчы з землякамі – магчымасцяў адпачыць, набрацца яркіх эмоцый у 16 лагерах было шмат! Аздараўленне за гэты час прайшлі 467 школьнікаў Ушаччыны, а гэта нават больш, чым планавалася.
Кацярына КАВАЛЕЎСКАЯ.
