А вы ведаеце, што ў Беларусі ёсць спецыяльны партал рэйтынгавай ацэнкі, дзе можна выказаць сваё меркаванне аб якасці абслугоўвання як дзяржаўнымі, так і прыватнымі арганізацыямі Беларусі? Рэйтынг фарміруецца на аснове ацэнак грамадзян, якім былі аказаны паслугі, сярод іх ёсць і ўстановы Ушацкага раёна.
Каб ацаніць паслугу ці работу якой-небудзь арганізацыі, трэба зайсці на партал у інтэрнэце і зарэгістравацца. Гэта зусім нескладана і займае адну-дзве хвіліны: неабходна толькі ўвесці сваю электронную пошту і прыдумаць пароль. Арганізацыю, якую хацелі б ацаніць, можна знайсці праз пошукавы радок, у пераліку, па сферах жыццядзейнасці і катэгорыях або на карце. У невялікай анкеце можна выказаць сваё меркаванне аб якасці работы той ці іншай арганізацыі ад 1 да 5 балаў. Крытэрыі адбору такія: прастата і зразумеласць працэсу атрымання паслугі, даступнасць інфармацыі пры яе атрыманні, захаванне тэрміну аказання паслугі, ветлівасць і добразычлівасць супрацоўнікаў арганізацыі. Для кожнай запоўненай анкеты разлічваецца сярэдняя адзнака па ўсіх крытэрыях, а выніковай ацэнкай арганізацыі з’яўляецца сярэдняя адзнака па ўсіх запоўненых анкетах.
Усяго на партале зарэгістравана 13570 арганізацый, сярод іх 4296 –Віцебшчыны і 70 – Ушацкага раёна.
Навошта такі рэйтынг? Гэта як мінімум дадатковы стымул для паляпшэння якасці работы з насельніцтвам.
Сярэдні ўзровень задаволенасці насельніцтва паслугамі складае 93,11%.
Дарэчы, у анкеце акрамя адзнак па жаданні можна дадаць свае каментарыі. Яны не з’яўляюцца афіцыйнымі зваротамі і не падпадаюць пад дзеянне Закона Рэспублікі Беларусь “Аб зваротах грамадзян і юрыдычных асоб”, аднак, прадстаўнікі арганізацый разглядаюць і аналізуюць усе анкеты карыстальнікаў, прымаюць да ведама выказаныя заўвагі.
Падрыхтавала Вольга КАМАРКОВА.
