У гэтым сезоне ў краіне адбылося некалькі здарэнняў пры эксплуатацыі атракцыёнаў.
12 мая на тэрыторыі перасоўнага луна-парка ў Лідзе з атракцыёна “Скаймастер” з вышыні каля 3 метраў выпала дзіця 2013 года нараджэння – дзяўчынка не была прышпілена фіксуючай прыладай у пасажырскім модулі.
Прычынамі здарэння сталі парушэнні як правілаў эксплуатацыі абслугоўваючым персаналам, так і карыстання атракцыёнам пасажырам і суправаджаючай асобай (маці). Расследаваннем устаноўлена, што адсутнічаў належны кантроль за несанкцыянаваным праходам наведвальнікаў, іх абслугоўваннем разам з дзяжурным займаўся работнік, які не меў адпаведных навыкаў і допуску, эксплуатацыйная дакументацыя часткова адсутнічала або не адпавядала патрабаванням прамысловай бяспекі.
Яшчэ адзін выпадак адбыўся 25 мая ў парку культуры і адпачынку Хоцімска. З-за працяглай эксплуатацыі (з 1987 года) узнікла няспраўнасць электрамагнітнага тормаза з наступным блакіраваннем атракцыёну “Кругавы агляд”. У гэты момант у пасажырскіх модулях на вышыні каля 18 метраў знаходзіліся 2 пасажыры. Траўм яны не атрымалі, іх эвакуіравалі работнікі МНС пры дапамозе аўтамабільнага каленчатага пад’ёмніка. 28 чэрвеня ў парку Гомеля таксама прыпынілася “Кола агляду” – з-за пашкоджання кабелю спрацавала тармазная сістэма. Пасажыры былі вызвалены з кабін абслугоўваючым персаналам з выкарыстаннем ручнога рэжыму кручэння, у медыцынскай дапамозе не мелі патрэбы.
16 чэрвеня ў гарадскім парку Гродна на атракцыёне “Малаток” атрымала траўму нагі дзіця 2011 года нараджэння. Няшчасны выпадак не звязаны з тэхнічным станам атракцыёну – выключна асабістая неасцярожнасць пасажыра, які выставіў нагу за ахоўную агароджу.
Віцебскае абласное аддзяленне Дзяржпрамнагляду.
