Пры выбары школьнай формы трэба ўлічваць яе камфорт. Інструктар-валеолаг Ушацкага раённага цэнтра гігіены і эпідэміялогіі Ала Васільеўна НІКІЦЕНКА дае парады па падборы адзення і аксесуараў:
– Пры набыцці вопраткі важна правільна падабраць памер, пераканацца, што дзіцяці ў ёй зручна і сядзець, і хадзіць. Тканіна павінна валодаць гіграскапічнасцю (здольнасцю паглынаць вільгаць) і паветрапранікальнасцю. Аддавайце перавагу вырабам з натуральных валокнаў (лёну, бавоўны, шэрсці) ці са змешаных тканін, у якіх утрыманне сінтэтыкі не перавышае 55 працэнтаў у касцюмным асартыменце і 30 – у блузках і кашулях.
Абутак лепш выбраць з натуральнай скуры. Пры гэтым абцас павінен быць невысокім: для шасцігадовых дзяцей – не больш сантыметра, ад сямі да 12 гадоў – да 2,5. У закрытых варыянтах не дапускаецца падкладка з сінтэтыкі.
Пры набыцці ранца ўлічвайце яго вагу. Яна павінна быць не больш за 700 г для вучняў пачатковых класаў і не больш за кілаграм — для сярэдніх і старэйшых. Пажадана, каб меліся святлоадбівальныя элементы. Даўжыню шлеек можна рэгуляваць для рознага росту дзяцей, а вось шырыня ў верхняй частцы павінна быць не менш за 3,5-4 см, у ніжняй — 2-2,5. Вузейшыя будуць ўразацца ў цела, дастаўляючы нязручнасці. Для малодшых школьнікаў ранец павінен мець формаўстойлівую спінку і наступныя памеры: вышыню задняй сценкі – ад 30 да 36 см, пярэдняй – ад 22 да 26 см, шырыню – 6-10 см. Не палянуйцеся памерыць, удакладніць, бо ад гэтага залежыць здароўе вашага дзіцяці.
Падрыхтавала
Кацярына КАВАЛЕЎСКАЯ.
