На апошнім пасяджэнні райвыканкама разгледжаны вынікі сацыяльна-эканамічнага развіцця раёна за першае паўгоддзе. Ушаччына, як і ў першым квартале, знаходзіцца на пятым месцы сярод раёнаў вобласці – выканана 11 з 15 паказчыкаў. Аднак больш увагі ўдзялялася тым, па якіх адстаём.
Раўненне на лясгас
Адзінае прамысловае прадпрыемства, якое павялічыла вытворчасць – Ушацкі лясгас. Выпуск піламатэрыялаў вырас на 12,1 працэнта. Філіял “Ушацкі” ЗАТ “Віцебскаграпрадукт” узровень мінулага года плануе дагнаць у трэцім квартале – з-за правядзення рэканструкцыі ён пакуль складае 90,2 працэнта. У красавіку тэндар на пастаўку прадукцыі ААТ “Гродна Азот” (самага буйнога заказчыка) выйграла “Твестуба ПРА”, у выніку чаго значна нарасцілі аб’ёмы вытворчасці. Падрыхтаваны пакет дакументаў да ўдзелу ў чарговым тэндары.
Па УП ЖКГ вытворчасць у супастаўных цэнах склала 97,9 працэнта. Улічваючы спецыфіку прадпрыемства і яго непрамысловы характар, выйсці на ўзровень вытворчасці 2023 года стане магчымым толькі з надыходам ацяпляльнага перыяду пры пэўных умовах надвор’я.
Тэмп росту валавой прадукцыі сельскай гаспадаркі за 6 месяцаў 2024 года склаў 116,3 працэнта да ўзроўню 2023 года, у тым ліку раслінаводства – 220,3 працэнта, жывёлагадоўлі – 109,6. Заданне выканана ўсімі сельгасарганізацыямі: спрыяльнымі ў параўнанні з мінулым годам выдаліся ўмовы для нарыхтоўкі кармоў – з траў першага ўкосу іх нарыхтавана ў 2,7 раза больш. І дзякуючы падтрымцы кіраўніцтва раёна не дапусцілі падзення малака і мяса ў складаны стойлавы перыяд.
Летняе кафэ… закрыта
Перавыканана заданне і па рознічным тавараабароце – па раёне на 536 тысяч рублёў. Сярод лідараў – “Санта” – тэмп росту 116 працэнтаў, “Еўрагандаль” – 107,3, “Дабраном” – 125, “Парфума Трэйд” – 129. Станоўчая дынаміка забяспечана 28 арганізацыямі з 37 афіцыйна ўлічваемых. Станоўча паўплывала на тавараабарот і правядзенне ў раёне ў маі-чэрвені буйных мерапрыемстваў, якія наведала вялікая колькасць гасцей.
А вось насычэнне таварамі гандлёвых аб’ектаў спажывецкай кааперацыі застаецца праблемным, што негатыўна адбілася на рознічным тавараабароце – 89,6 працэнта да аналагічнага перыяду мінулага года. Сёлета не такі востры дэфіцыт сацыяльна значных тавараў у кропках сістэмы, аднак з-за фінансавых цяжкасцяў не ўдаецца ўтрымліваць нават ранейшыя пазіцыі. Напрыклад, не выканана заданне райвыканкама па адкрыцці летняга кафэ па вуліцы Віцебскай. “Калі не там, то ў любой ажыўленай кропцы горада трэба паставіць бочкі з натуральным свежым квасам, як гэта было раней. Чаму няма таннага і смачнага марожанага “Лепелька”? Трэба больш настойліва вырашаць пытанні з вышэйстаячай арганізацыяй, калі патрэбна – з нашай дапамогай”, – рэзюміраваў старшыня райвыканкама С.С.Садоўскі. Не так, як трэба, працуе кропка на пляжы, пастаўлена задача таксама навесці парадак на рынку і здаць у арэнду плошчы ў гарадскім пасёлку, якія не выкарыстоўваюцца.
Будуемся – значыць развіваемся
Інвестыцыі ў асноўны капітал і па аб’ёмах будаўніча-мантажных работ склалі 142,6 і 175,9% адпаведна. На будаўнічыя аб’екты прыпадае 65,4 працэнта ўсіх інвестыцый: узвядзенне інтэрната для спартсменаў – 5192 тыс. рублёў або 22,2; рэканструкцыя аўтадарогі Р-46 – 4232 або 17,4; індывідуальнае жыллё – 3255 тысячы ці 13,4% ад агульнага аб’ёму інвестыцый. На фарміраванне асноўнага статка накіравана 2278 тыс. рублёў або 9,4%, мадэрнізацыю вытворчасці “Віцебскаграпрадуктам” – 726 тыс. рублёў або 3,0%. Вялікія аб’ёмы інвестыцый прыходзяцца на РУП “Віцебскэнерга” – толькі за 6 месяцаў гэта 1,7 млн. рублёў пад замену ліній для магчымасці правядзення электраацяплення.
Ушацкі лясгас каля 1,5 млн. рублёў накіраваў на пакупку машын і абсталявання. Адкрытым застаецца будаўніцтва рэзідэнцыі Дзеда Мароза, прадпрыемству пастаўлены тэрмін – да 1 снежня бягучага года.
Экспарт тавараў і паслуг
Па знешнім гандлі добра спрацавалі Ушацкі лясгас і санаторый “Лясныя азёры”, што дало магчымасць у цэлым па раёне павялічыць экспарт тавараў у 2,3 раза пры заданні росту на 1 працэнт. Экспарт паслуг складае 122,5 працэнта: на турыстычныя прыпадае 66,2, транспартныя – 20,6 – павелічэнне ў 1,5 раза.
Незаробленыя заробкі
Асноўны аб’ём прыбытку ад рэалізацыі прыпадае на 3 арганізацыі раёна: Ушацкі лясгас, УП ЖКГ і “Лясныя азёры”. Сельскагаспадарчыя арганізацыі, за выключэннем КУСГП “Глыбачаны”, стратныя, а найбольшую суму мае УП “Сафійскія дары”. Адна з прычын – нізкая рэнтабельнасць.
Ва ўсіх арганізацыях, за выключэннем ПМК-66 (25,5) і ДРБУ №105 (12,1) фонд заработнай платы ў выручцы перавышае нарматыў: 36 працэнтаў пры норме 25. Блізкія да выканання камунгас – 28,2% і “Лясныя азёры” – 26,8.
Заработная плата пры заданні 112,6 працэнта фактычна павялічылася на 118,8.
Дэфіцыт кадраў
Цякучасць кадраў застаецца на ўзроўні 13,3 працэнта пры заданні 13,6. Найбольшая назіраецца ў гандлі – 25,6, будаўніцтве – 22,2, сельскай гаспадарцы – 16,6, творчасці, спорце, адпачынку – 16,2. Па пагадненні бакоў звольнілася 147 чалавек або 36 працэнтаў, заканчэнні тэрміну працоўнага дагавора (кантракта) – 131 чалавек або 32,1, з якіх больш за палову – гэта сезонныя і часовыя работнікі, па ўласным жаданні – 12,5%. 35 работнікаў звольнена за прагулы і іншыя парушэнні працоўнай дысцыпліны, 4 накіраваны ў ЛПП, адзін – у сувязі са стратай даверу. Астатнія перарвалі працоўныя дагаворы па аб’ектыўных абставінах: пенсія, прызыў на ваенную службу, па стане здароўя. Кадравае пытанне востра стаіць ва ўсіх сферах дзейнасці, у раёне маецца каля 200 вакансій.
Папаўненне бюджэту
Адным з мэтавых з’яўляецца і паказчык па сукупных паступленнях даходаў кансалідаванага бюджэту, тэмп росту якіх за студзень-чэрвень склаў 115,5 працэнта пры гадавым заданні 109,4, у тым ліку па падаходным падатку з фізічных асоб – 118,4, з даходаў ад прадпрымальніцкай дзейнасці – 120,9, пры спрошчанай сістэме падаткаабкладання – 87,9, адзіным падатку з індывідуальных прадпрымальнікаў і іншых фізічных асоб – 87,7.
Вольга КАРАЛЕНКА.
